Lávvordaga sáhttet buohkat geahččalit šilju geain lea vuodjinkoarta ja 16-jahkásaččat geain lea hárjehallanduođaštus biilla vuodjit. NAF rahpá buot 26 hárjehallanšilju olbmuide, ii ge dárbbaš leat NAF-miellahttu.
– Goas ledjet maŋemusat hárjehallanšiljus vuodjime biillain? Soaitá leat dalle go váldet vuodjinkoartta, ja ollugiidda lea dat máŋga jagi áigi, jearrá NAF.
Geahččal iežat biilla
Rabas beaivvis NAF hárjehallanšiljus sáhtát geahččalit movt lea go siivu lea heittot ja lea gálja – nu ahte lea báikkis gos lea sihkar geahččaladdat.
– Sáhtát geahččalit movt du iežat biila láhtte ja makkár gáržžádusat das leat. Sáhtát geahččalit stivret eret hehttehusain mat leat šiljus, iešguđet leahtu ja váttis áŧestusaid. Sáhttá dáhpáhuvvat ahte ribahat biilla eret šiljus, muhto dat ii leat várálaš min šiljuin, lohká NAF koordináhtor ja johtolatoahpaheaddji Mary S. Schjerpen.
Olles bearáš mielde
Sáhtát maid olles bearraša váldit mielde biilii, vai buohkat besset vásihit mii dáhpáhuvvá go ferte garvit deaivamis hehttehusaid dahje go ferte garrasit goahcat.
– 16-jahkásaččat geat hárjehallet leat maid bures boahtimat geahččalit, muhto sis ferte leat veahkki mielde gii lea badjel 25 jagi boaris ja geas lea leamaš vuodjinkoarta unnimusat vihtta jagi. Muitte čájehit duođaštusa ahte leat čađahan johtolatvuođđokurssa, lohká Schjerpen preassadieđáhusas man NAF lea sádden.
