Mannan vahkkoloahpa lágiduvvojedje Čakčariemut Guovdageainnus, ja dan oktavuođas ledje lávvordaga márkanat Arctic Lavvo ođđa vistti luhte.
Márkaniid oktavuođas lei Arctic Lavvo almmolaš rahpan ođđa visttis, ja vistti olggobeallái lei Guovdageainnu ealáhussearvi bovden sihke priváhta olbmuid ja fitnodagaid boahtit vuovdit dahje čájehit iežaset gálvvuid.
Arctic Lavvo lei ceggen gámmiid olggobeallái, márkaniin lei kafea, ja Ábas eaktodáhttoguovddáš lágidii ovttas Puls sko&klær bivttasčájáhusa.
Njunuš politihkkárat modeallan
Bivttasčájáhus dagai hirbmat eallasa ja geasuhii ollu gehččiid.
Čájáhussii serve earret eará Guovdageainnu suohkana njunušpolitihkkárat.
Guovddášbellodaga vuosttaševttohas Hans Ole Eira, Gurutbellodagas sihke vuosttaševttohas Isak Ole J. Hætta ja guđatevttohas Gunn Elisabeth Kristensen, ja Sosialisttalaš Gurutbellodaga vuosttaševttohas Marit Susanne Utsi ledje buohkat modeallat bivttasčájáhusas.
Mánát vuite Ávvira gilvvuid
Ávvir lágidii márkaniid oktavuođas quiza ja tevdnengilvvu, ja ledje oallugat geat serve gilvvuide.
Tevdnengilvvu vuittii Lise Marie Sara, ja quiza vuittii Berit Ine Elida Buljo.
Sii geat lávvordaga diŋgojedje ođđa abonnemeantta Ávviris leat mielde vuobádeamis giissá, ja vuorbádeapmi dahkko maŋŋelaš teknihkalaš sivad geažil go Ávvira neahttasiiddu máksinvuohki ii doaibman nu movt galggai.