-Almmuhus-
-Almmuhus-
-Almmuhus-
GUOIMMUHEAPMIVaikke balai guolis, de vuittii oaggunstávrrá

Vaikke balai guolis, de vuittii oaggunstávrrá

-

-

Mannan vahkku sáddii Sara Isabelle Buljo gova Ávvira mánáidoaggungilvui, dainna son vuittii oaggunstávrrá.

Dán vahkku lea Ávvir vuorbádan ođđa oaggongilvovuoiti ja vuoitu lea oaggunstávrá. Vuoiti lea Sara Isabelle Buljo ja son lei oaggume mearragáttis Duikkašvuonas. 

Eadni Sara Inger Elisabeth Buljo muitala ahte lei hui somá oaggut. 

 – Su mielas lei hui somá oaggut, ja boagustii hui ládje go oaččui dan guoli, muhto balai maid sakka dan guolis. 

 

Vuosttaš geardde stávrráin

Sara Isabelle lei vuosttaš geardde oaggume mearas stávrráin. 

 – Son lea gal okte goddán guoli rutnis, muhto dál lea vuosttaš geardde go mearas oaggu stávrráin.  

 

Balai guolis

Buljo muitala ahte áhčči šattai veahkkin guoli oažžut gáddái go Sara Isabelle veaháš balai guolis. 

 – Son logai ahte juoga lea gitta vuoggas. Son  ii áigon ieš váldit dan bajás ja hoigadii eret stávrrá. Son lei sakka suorganan ja čurvii áhččái ahte soai váldiba bajás guoli. 

Sara Isabelle gottii stuorát guoli go oabbá. 

 –  700 grámma dettii guolli, ja lei storát guolli go oappás, muitala su eadni Sara Inger Elisabeth Buljo.

 

Gilvu bistá vel vahkku

Mii sávvat lihkku Sara Isabellii ja ávžžuhat mánáid ain sáddet guollegovaid min oaggungilvui.

Gilvu bistá borgemánu 18. beaivái. Mii vuorbádat vahkkosaččat oaggunstággovuoiti, ja loahpas vuorbádat buot oasse­váldiid gaskkas vel váldovuoiti.

Son vuoitá 1500 ruvnno árvosaš skeaŋkakoartta.

-Almmuhus-