KS stivrrajođiheaddji Gunn Marit Helgesen mielas berresii lágaid rievdadit, vai gielddat ja fylkkagielddat beasašedje árvvoštallat ja meannudit politihkalaččat gosa heive cegget bieggamilluid.
Kommunesektorens organisasjon (KS), dahje gielddaid organisašuvdna ja ovdánahttinguoibmi, čállá preassadieđáhusas ahte bieggamilloprošeavttain berre leat doarjja báikegottis.
KS stivrajođiheaddji, Gunn Marit Helgesen lohká gielddasuorgi berrešii oažžut buoret váikkuhanvejolašvuođa go dat mii dál lea.
Láhka ii atte vejolašvuođa
Lohká lágaid ferte rievdadit vai gielddat ja fylkkagielddat leat njunnošis go áššemeannudit bieggamilloáššiid.
Dál eai regionálaplánat, eaige NVE (Norgga čázádat- ja energiijadirektoráhtta) evttohusat atte gielddaide ja fylkkagielddaide dakkár vejolašvuođa.
Árvvoštallan gullá politihkálaš meannudeapmái
Helgesen lohká árvvoštallan gokko heive bieggamillorusttegiid cegget, gáibida álo árvvoštallama ja dákkár árvvoštallama berrešii politihkalaččat meannudit, erenoamážit báikálaččat.
– NVE nationálarámma evttohus bieggamillofápmohuksemii nannámis, ii berreše leat mearrideaddji gosa sáhttá hukset dahje ii, deattuha Helgesen.
