Almmuhus

Almmuhus

Ávvira geasse­gilvvu 3 finálistta gilvalit

FINALISTTAT: Ánde Niillas Utsi, Elle Inga Eira ja Martin Rimpi.

Finálavuorus vástidit buot golbma gilvaleaddji seamma álgogažaldagaid, liigegažaldagaid ja árvalusaid.

Almmuhuvvuon: 
Maŋŋebárga, 13 Borgemánu, 2019 - 15:18
Ođastuvvon: 
Ođastuvvon: 14.08.2019 - 09:10
Fáddásánit: 

Finálas leat Ánde Niillas Utsi, Elle Inga Eira ja Martin RImpi.

 

1. Mii lei Nils Gaup nuppi filmma namma?
Martin:  – Lea go son Harald Hårfagre? Juoidá HH goit lei, in muitte. BOASTUT
Ánde Niillas:  – Mii son dat lei … Ofelaš. BOASTUT
Elle Inga:  – Dán mun gal in dieđe, árvidan Ofelaš. BOASTUT

 

Rievttes vástádus: Håkon Håkonssen

 

2. Gii lea norrøna mytologiijas «ráhkisvuođa- ja vuorbbiipmil» ?
Martin:  – Yggdrasil. BOASTUT
Ánde Niillas:  – Frøya. BOASTUT
Elle Inga:  – Frøya. BOASTUT

 

Rievttes vástádus: Frigg

3. Mat leat golbma dábáleamos muorrašlája Norggas?
Martin:  – Soahki, beahci ja «gran» dárogillii. RIEKTA
Ánde Niillas:  – Soahki, «gran» ja «furu». RIEKTA
Elle Inga:  – Beahci, soahki ja sieđga? Ii hal sieđga leat muorrašládja, ha-ha! «Gran» lea dat maŋimuš. RIEKTA

Rievttes vástádus: Guossa, soahki ja beahci.

Šaddet liigegažaldagat go gilvaleaddjit faskejedje seamma olu čuoggáid álgovuorus:

1. Mii lea ateisma?
Martin: – Go osku ahte ii gávdno Ipmil. RIEKTA
Ánde Niillas: – Go ii jáhke ahte gávdnojit Ipmilat. RIEKTA
Elle Inga:  – Go ii leat makkárge osku. RIEKTA

2. Galle bussá leat leamaš máilmmiávus?
Martin:  – Ii oktage. BOASTUT
Ánde Niillas: – Dat bat maid leat doppe fitnan. Árvidan 1. BOASTUT
Elle Inga:  – Doppe gal lea leamaš vaikke makkár eallit, árvidan guokte. RIEKTA

3. Lea go giehka bárbmoloddi?
Martin: – Juo. RIEKTA
Ánde Niillas: – Juo, dat lea. RIEKTA
Elle Inga: – Lea. RIEKTA

4. Mii lea Norgga nubbin stuorámus gávpot?
Martin: – Bergen. RIEKTA
Ánde Niillas:  – Čáhcesuol! Ha-ha, ieš mun dájun, Bergen dat lea. RIEKTA
Elle Inga: – Bergen. RIEKTA

5. Mii lea norgalačča namma gii gohčoduvvo «Vuođđolága áhčči»?
Martin: – Su namma lea Christian Magnus Falsen. RIEKTA
Ánde Niillas: – Christian Magnus Falsen. RIEKTA
Elle Inga:  – Ále mat vuos, ferten smiehtastit… Christian Magnus Falsen lea «vuođđolága áhčči». RIEKTA

Dál eai beasa gilvaleaddjit ieža válljet árvádusa.

Ávvir lea válljen sidjiide alit árvádusa ja das sáhttá 10 čuoggá oažžut:
 

Mun lean sihke olggobealde ja siskkobealde. Gávdnon juohke viesus. Mii lean mun?
Martin: – Uksa dat lea. RIEKTA
Ánde Niillas: – Dát lei albma «lurespørsmål»! Rohpi dahje dáhkki, láse maid sáhttá. Sáhttá leat vaikke mii. RIEKTA
Elle Inga: – Sihke olggobealde ja siskkobealde … Na, dat gal sáhttet máŋga diŋgga. Seaidni? Bohcci? Uksa? Uksa mun dajan. RIEKTA

Bohtosat:
Martin: 15 čuoggá
Ánde Niillas: 16 čuoggá
Elle Inga: 16 čuoggá

 

Ávvir divvu:

Vuossárgga, borgemánu 12. beaivvi almmuhii Ávvir ášši báberáviissas, mas dán jagi geassegilvvu finalisttat gilvaledje. Finálas ledje Ánde Niillas Utsi, Elle Inga Eira ja Martin Rimpi. Áššis nammaduvvui Elle Inga Eira vuoitin.

Maŋŋil go leimmet čađahan finálavuoru de čájehuvvui ahte leat meaddán go Ánde Niillas Utsi galggai vástidit vuosttaš gažaldahkii. Ávvir jearai sus ahte mii lei Nils Gaupa vuosttaš filmma namma, ii ge mii lei su nuppi filmma namma nu mo áššis čuožžu. Utsi vástidii dása «Ofelaš», mii lei ge Nils Gaup vuosttaš filmma namma. Nu livččii son galgat oažžut čuoggá dás.

Go sus ja Elle Inga Eiras gárte seamma olu čuoggát, nammalassii 16 čuoggá, de lea Ávvir mearridan goappašagaid nammadit vuoitin dán jagi geassegilvvus. Mii šállošat meattáhusa ovddas.

 

Mis leat guokte vuoiti!

Olu lihkku Elle Inga Eirai ja Ánde Niillas Utsii!

 

Soai vuoitiba iPada goabbáge.

Mii giitit buohkaid geat dán geasi leat searvan Ávvira geassegilvui.

Ovdasiiddus dál