Vaikke eananguovlosearvvi 40. luossagilvvus ledje 36 oasseváldi, de dušše okta luossa goddui.
Vaikke eananguovlosearvvi 40. luossagilvvus ledje 36 oasseváldi, de dušše okta luossa goddui.
Govven: Anssi Kömi
Gilvvu vuittiiga Seppo Taskinen ja Jaakko Tanninen, sudno vuoitoguolli dettii badjelaš 6,3 kilo.
Mánáid gilvvus fas ledje logi unna luossabivddáža šlivgumin gáttis ja Isak Pieski rohttii gáddái hárri ja vuittii gilvvu áidna guliin.
Luossagilvvu vuoitiguovttos gottiiga luosa gilvvuid álggu bealde ja gilvobáikki bajágeahčen, Áhguoikkas.
Eará oaggut begge gal guliid dihtton ja dohppestange, muhto muđuid gilvvuid sálaš bázii duođaid unnin.
Taskinen ja Tanninen oaččuiga bálkkašupmin Ánot-Hánssa Eino duddjon deanufatnasa, čállá Vuovdaguoikka eananguovlosearvvis Pentti Pieski preassadieđáhusas.
Oaggungilvvus eará bálkkašumit vuorbáduvvojedje
Nubbin luossagilvvus bođii vuorbádeami bokte Heikki Tuovila ja son oaččui bálkkašupmin 40” led-tv ja goalmmádin vuorbádeamis bođiiga Veikko Nillukka ja Henri Muhonen ja oaččuiga bálkkašupmin elektrovnnalaš biergofeartna.
Govven: Pentti Pieski
Molsašuddi dálki
Gilvvuid áigge gilvvohallit ja guossit vásihedje máŋggalágan dálkkiid. Gilvu álggii arvvis ja biekkas ja dan maŋŋá firtii, gaskkas báittii beaivvášge. Gilvvu loahpabealde balvii ja de čuorpmastišgođii.
Gilvvuid lágideaddjit gerge justa čorget gilvobáikki ja gurput maŋimuš gálvvuid vuorkái go bođii čoaska biegga oktan čuorbmasiiguin.
Vuovdaguoikka eananguovlosearvi giitá gilvvuide oassálastán ja báikki ala boahtán olbmuid ja eandalii gilvvuid lágideapmái oassálastán eaktodáhtolaš bargiid.
Boahtte jagi deaivvadat fas seamma báikkis suláid seamma áigge, čállá Vuovdaguoikka eananguovlosearvvis Pentti Pieski preassadieđáhusas.
mieđuštemiin.
Govven: Pentti Pieski
