Norgga ráđđehus juolluda 20 miljovnna ruvnno programmerendoarjaga skuvllaide. Sámi joatkkaskuvla- ja boazodoalloskuvla Guovdageainnus oažžu 75.000 ruvnno.
Ruhta lea várrejuvvon rusttegiidda mat nannejit oahpaheddjiid programmerengelbbolašvuođa luohkkálanjas.
Oktiibuot 57 gieldda, 11 fylkkagieldda, 14 friddjaskuvlla ja Sámi joatkkakuvla ja boazodoalloskuvla, mii lea stáda skuvla, ožžot doarjaga, čállá oahppodepartemeantta.
Sihkkarastet gelbbolašvuođa
– Mii oaidnit ahte máŋga gieldda ja fylkkagieldda leat álggahan barggu nannet oahpaheddjiid gelbbolašvuođa programmerensuorggis.
Sii dárbbašit rusttegiid vai sáhttet oahpahit ohppiideaset.
Dát doarjja lea dehálaš oassi sihkkarastit skuvllaide vejolašvuođa nannet dán, dadjá stádačálli ja Olgešbellodaga Julie Midtgarden Remen.
Oassin vuoruheamis
Dát doarjja lea oassin viđa jagi vuoruheamis mii álggahuvvui diibmá Teknologalaš skuvlaseahka bokte.
Boahtte čavčča rájes doaibmagoahtá Máhttolokten 2020 fágaođastemiin ja ođđa oahppoplánat doaibmagohtet.
Dalle šaddá programmeren oassin oahppoplánain sihke matematihkas ja luonddufágas.
Dán geažil lea dehálaš ahte skuvlaeaiggádat ráhkkanit bures ođđa oahppoplánaide, dadjá stádačálli.
Dán jagi leat máŋga skuvlaeaiggáda davvin kvalifiserejuvvon oažžut doarjaga.
Lassin leat máŋggas geat diibmá eai deavdán ohcangáibádusaid, fas ohcan ja nu ožžon doarjaga.
(@NTB)
