Soapmásiin lea lagas ságastallan Kirkens SOS:ain dat áidna gulahallan olles luomus. Badjel 22 000 olbmo leat váldán oktavuođa Kirkens SOS bálvalusain go dovdet oktovuođa.
Kirkens SOS lea dás birrajándora olbmuid váste geat dárbbašit hupmanguoimmi.
Measta 500 ságastallama jándoris
Kirkens SOS, mii lea Norgga stuorimus birrajándor heahtebálvalus telefovnnas ja interneahtas, lea dán geasis čađahan badjelaš 22 000 ságastallama olbmuiguin geassemánus dán rádjái. 19 323 telefovnna bokte, 1643 neahta bokte ja 1148 SOS-dieđu bokte, dahje ahte gárte measta 500 ságastallama juohke áidna beaivvi.
Dárbbašit ságastallanguoimmi luopmoáigge
Lea geassi ja luopmu. Lea áigi go leat olu buorit áššit, muhto earáide sáhttá dilli leat váttisin.
– Muhtimiidda lea dat áidna ságastallan geasseluomus go riŋgejit midjiide hupmandihte, lohká Kirkens SOS váldočálli Leif Jarle Theis.
Kirkens SOS vásiha juohke jagi ahte geassi lea hušaš áigi ja ahte leat ollugat geat dárbbašit min. Mii oaidnit ahte heahtebálvalusa bargu lassána go lea luopmu, ja ahte ii leat kapasitehta dain bálvalusain mat muđuid leat olbmuide geain lea lossa dilli.
Hástalusaid birra hupmet
Leat iešguđetlágan fáttát man birra ságastallet, nu go oktovuohta, relašuvdnahástalusat ja psyhkalaš váttut. Muhtimat muitalit áššiid birra mat leat guhkit áigge čuohcan, ja earát ges áššiid birra mat leat luomus dáhpáhuvvan.
– Stuorámus erohus maid oaidnit, lea ahte ollu áššit gullet relašuvnnaid ektui, erenoamážiid bearrašis, lohká Theis ja ahte eambbogat maid čállet sidjiide. Nuorat geardi vállje eanemusat čálalaččat váldit singuin oktavuođa.
Dehálaš eaktodáhtolaččat
Leat Kirkens SOS 1000 eaktodáhtolačča geat leat mielde fállame Heahtebálavlusa telefovnna ja interneahta bokte. Bálvalusas sáhtát čiegadit gii don leat, ja dan dihte ii sáhte Kirkens SOS diehtit galle eallima gádjot. Eaktodáhtolaččat ja bargit ožžot dađistaga dieđu olbmuin ahte ságastallamat mat leat leamaš eaktodáhtolaččaiguin leat leamaš stuora ávkin, ja sáhttet maid gádjon sin heakka.
– Eat livččiimet nagodit dan jus eai livčče eaktodáhtolaččat geat barget ija beaivvi, nu ahte sáhttit fállat birrajándor fálaldaga buohkaide geat dovdet dárbbu dasa, lohká váldočálli Leif Jarle Theis preassadieđáhusas.
