Ávvira mánáidoaggungilvu lea álgán ja vuosttaš vuoiti lea vuorbáduvvon Lian Elander gottii 3,6 gilosaš Hávgga. Sus lei albma guollelihkku ja vuittii oaggunstávrrá.
Ávvira mánáidoaggungilvu lea álgán ja vuosttaš vuoiti lea vuorbáduvvon Lian Elander gottii 3,6 gilosaš Hávgga. Sus lei albma guollelihkku ja vuittii oaggunstávrrá.
Lei vuosttaš geardde go Lian Elander lei okto oaggumen, go stuora hávga dohppii vuggii.
Son muitala ahte hávga lei gátti lahka ja lei álki geassit dan gáddái.
Go oaččui hávgga gáddái, de son vihkkii dan ja fuobmái ahte hávga deaddá 3.6 gilo.
– Dat lei oba suohtas goddit nie stuora guoli!, dadjá Lian Elander ja mojohallá.
Fiinna dálki
Hætta muitala ahte son láve Čievramiellis oaggut.
Sutnje lea álki go lea nu lahka viehkalit eatnogáddái oaggut.
Son láve dávjá oaggut guliid, muhto eanemusat de go lea fiinna dálki.
– Dán jagi gal mun in leat šaddan nu olu oaggut, muitala Lian Elander.
Vuosttaš guolli
– Hávga maid godden moadde beaivvi áigi, lei dat vuosttaš guolli maid lean goddán dán geasi. In mun leat šaddan oaggut nu olu ja danin in leat eanet guliid goddán.
Lian Elander muitala ahte diibmá son oakkui hui olu.
Son gottii dievva «dábálaš guliid», maid son čilge ahte leat hárrit.
Muđuid lea maid son goddán hávgga.
Ođđa stávrá
Son vuoitá oaggunstávrrá.
Gilvui sáhttet searvat buohkat geat leat vuollel 18 jagi boarrásat, guollegilvui sáhttá searvat Ávvira neahttasiiddus.
Loahpas geasi leat maid buohkat geat oassálastet, mielde vuorbádeamis mas sáhttá vuoitit 1500 ruvnno árvosaš skeaŋkakoartta.
Lian Elander Hætta sáddii guollegova Ávvirii ja vuittii oaggunstávrrá.
Son lea dat vuosttaš gii dán geasi lea vuoitán ja sádden gova Ávvirii.
– Dat lei oba suohtas vuoitit ođđa oaggunstávrrá. Lei hui fiinna stávrá!, dadjá Lian Elander.
Son muitala ahte áigu geahččalit stávrrá fargga.
Son soaitá ihttin vuolgit oaggut ja de beassá ođđa stávrrá dohppestit fárrui.
Sávvamis lea fiinna dálki de!
