Buot badjel 70-jahkásaš pensionisttat, geat ásset Gáivuona suohkanis, ožžot nuvttá festiválapássa Riddu Riđđu festiválii.
Dán jagi sávvá Riddu Riđđu erenoamážit gudnejahttit boarrásiid ja dahket álkibun sidjiide galledit festivála.
– Boarrásiin lea álo leamaš dehálaš rolla álgoálbmogiid bearrašiin. Sii ovddastit máhtu ja viissisvuođa, muitala festiválajođiheaddji Sandra Márjá Vest.
Heive buot ahkásaččaide
Dán jagáš Riddu Riđđu festiválas lea prográmmafálaldat sihke mánáide ja ollesolbmuide, ja šaddá ge deaivvadanbáikin gos iešguđet ahkásaččat besset juogadit vásáhusaid ja máhtu.
Váikkuhit duohtavuođa- ja seanadankommišuvnna bargguid
Duohtavuođa- ja seanadankommišuvdna, mii galgá dutkat dáruiduhttinpolitihka ja eahperivttiid mat dáhpáhuvve sápmelaččaide, kvenaide ja norggasuopmelaččaide, lea gávdnamis festiválas.
Festiválajođiheaddji sávvá olbmuid váldit dán vejolašvuođa humadit kommišuvnnain, ja dainna lágiin váikkuhit sin bargguid dáruiduhttima kártemiin.
Rievdadusat festiválaguovllus
Leat dahkkon praktihkalaš rievdadusat festiválaguovllus. Earret eará leat dat bivnnuhis márkanat sirdon, ja dohko lea nuvttá sisabeassan beaivet.
Dasa lassin lea ásahuvvon sierra njamahanlávvu, jearahallamiid maŋŋel.
Festivála fálaldagat
Riddu Riđđu festivála lea internationála álgoálbmotfestivála, mii ávvuduvvo jahkásaččat Gáivuona suohkanis Davvi-Romssas.
Festivála dollo olgun, ja das leat fálaldagat olles bearrašii.
Prográmmas leat máilmmiviidosaš álgoálbmotmusihkka, dáidda, teáhter ja dánsa, dáiddalaš ja politihkalaš workshopat nuoraide, mánáidfestivála, áigeguovdilis seminárat, kursaprográmmat, filmmat ja girjjálašvuohta.
