-Almmuhus-
-Almmuhus-
-Almmuhus-
OĐĐASATÁrbevirolaš stivrenvierut ságastallanfáddán

Árbevirolaš stivrenvierut ságastallanfáddán

-

-

Ođđa guovttejahkásaš Siidaskuvla-prošeakta fállá vejolašvuođa guorahallat mo ja makkár oktavuođain árbevirolaš sámi stivrenmállet sáhttet doaibmat dálááigge.

Kuokkanen dutkamuš

Siidaskuvla-prošeavtta jođiheaddji Jovnna Jon Ánne Kirstte Rávdná, Rauna Kuokkanen, lea dutkan eamiálbmogiid iešmearrideami, mii lea gieskat ilbman girjin Restructuring Relations: Indigenous Self-Determination, Governance, and Gender (2019).

Jovnna Jon Ánne Kirstte Rávdná, Rauna Kuokkanen, lea dutkamušastis gávnnahan, ahte Sámis lea duhtameahttunvuohta dálá vuogádahkii, mas sentraliserejuvvon oarjemáilmmi mielde huksejuvvon politihkalaš ásahusat eai vástit sápmelaččaid árbevirolaš vuogádaga ja servodaga árvvuid ja vieruid.

Árbevirolaš osiid máhcahit

Siidaskuvla čoahkkana vuosttas háve Levssejogas geassemánu 22. beaivve doaluide mat leat rahpasat buohkaide geat háliidit čuovvut daid.

– Mis leat guhká leamaš iešguđet ságastallamat ja buorit jurdagat siiddaid ođđasit atnui váldimis, ja dál mis lea viimmat vejolašvuohta beassat gieđahallat dáid áššiid vuđolaččat. Dárkkuhus lea ságastallat ovdamearkka dihte fertešii go árbevirolaš siiddaid dahje muhtun osiid dain máhcahit, ja manin dahje manne ii, muitala Kuokkanen.


Kárta mas oaidná gos gávdná doaluid. Kárta: Siidaskuvla

Ságastallan siiddaid birra

Siidaskuvlla koordinerejeaddji Ville Ristena Pirkko Anne, Anne Olli, oaidná deaivvadeami sihke ságastallan- ja oahppandilálašvuohtan.

– Dát lea aivve juohkehažžii earenoamáš dilálašvuohta beassat ságastallat ja oahppat siiddaid birra. Anán dehálažžan, ahte dákkár ságastallamiin gullojit máŋggalágán sámiid jienat. Dán áigge njálmmálaš árbevierru ii gánske sirdašuva šat aivve nu nannosit, muhto gánske Siidaskuvla sáhttá leat veahkkin dasge, smiehttá Olli.

 

Guorahallat movt doaibmá

Siidaskuvlla ulbmilin lea siidaortnega doaibmamálliid, vieruid ja árvvuid guorahallan ja ođasmahttin. Dát sámedutkiid, dáiddáriid ja eará servodatberošteddjiid oktasaš prošeakta geahččala guorahallat ja iskat mo siida lea doaibman ja makkár oasit das ain doibmet sápmelaš servodagas.

Siidaskuvlla deháleamos ulbmilin lea čielggadit siidaortnega mearkkašumi ja vejolašvuođaid otnábeaivve dárbbuid várás. Lágideapmái lea Siidaskuvla ožžon ruhtadeami Kone foanddas.

 

Bearašdoalut

Lágideaddji almmuha ahte deaivvadeapmi lea nuvttá ja heive buot ahkásaččaide.

– Olles bearrašat leat buresboahtimat, mánáide leat maiddái doaimmat, čállá lágideaddji doaluid oktavuođas.

Doppe besset gullat Deanu guovllu olbmuin Badje-Deanu siidda birra, siiddaid historjjá ja sámiid guolástanrivttiid birra. Dasa lassin lohpida lágideaddji gáfestallama, lávostallama, ságastallama ja dolastallama.

Deaivvadeapmi lea alkohol- ja narkotihkkafriddja, ja oassálastiid ávžžuhit váldit iežas niestti mielde ja gárvvodit dálkái heivvolaččat.

 

-Almmuhus-