Almmuhus

Almmuhus

Máhccá Márkomennui

Máhccá: Ailu Valle doalai iežas vuosttaš almmolaš konseartta Márkomeanu festiválas, dál máhccá riemuide mat lágiduvvojit 20. geardde dán geasi. Vuorkágovvá: Ovlla Gaup

Ailu Valle ráppii iežas vuosttaš almmolaš konseartta Gállogiettis, dál máhccá Márkomennui mii lágida 20 jagi ávvudeami. Maiddái Ánná­suolu čuojaha riemuin.

Almmuhuvvuon: 
Bearjadat, 3 Miessemánu, 2019 - 11:20
Fáddásánit: 

Márkomeannu lágiduvvo 20. geardde dán geasi.

Festivála lea válbmemin musihkkaprográmma ja almmuhit ahte Ailu Valle ja Ánnásuolu čuojahit festiválas.

Ovdalaččas leat jo dieđihan ahte Mari Boine, ISÁK ja Kevin Boine galledit riemuid.

 

Valle ruovttoluotta

Suoma beal Sámi ráppár Ailu ­Valle lea máŋgii čuččodan Márkomeanu lávddis, ja sus lei maiddái vuosttaš almmolaš konsearta Gállo­giettis.

Go dán geasi máhccá riemuide, de lágida maiddái ođđa skearru almmuhankonseartta.

Su musihkka ilbmá dán giđa.

Ailu Valle dovdomearkkat leat nana servodatáŋgiruššan ja ­buorre jietnageavaheapmi go ovdan­buktá iežas teavsttaid sámegillii, suomagillii ja eaŋgalasgillii.

Go lávke lávdái lea sus ovttasbargoguoibmi ja buvttadeaddji Aqqalu Berthelsen mielde, čállá Márkomeannu preassadieđáhusas.

– Lea stuorra illu go Ailu fas čuojaha Márkomeanus.Lea erenoamáš somá go boahtá ruovttoluotta min 20-jagi ávvudeapmái, 10 jagi maŋŋá go doalai iežas vuosttaš konseartta min luhtte, dadjá Márkomeanu festivála­hoavda Aili Guttorm.


Ánnásuolu čuojaha maid dán jagi Márkomeanus. 
Govven: John-Kåre Hansen

 

Ođđa musihkka

Maiddái Ánnásuolu čuojaha ođđa musihka Márkomeanu lávddis, go joavkkus ilbmá skearru geasse­mánus.

Ánnásuolo lávlagat leat sámegillii ja sii čuojahit vuogas ja ­čáppa jazzamusihka masa seaguhit ­veahá popmusihka.

Joavkku šuokŋa­dahkki ja gitarista John-Kåre ­Hansen šattai 2018 Sámi Music Awards šuokŋadahkkin ja ­joavkku lávlu Marianne Pentha ges lea beaggán máŋgga TV-prográmmas ja lea lávlon ovttas KORK:in (kring­kastingsorkesteret).

– Ánnásuolu bidjá njuollasiid girddašit iežas čáppa teavsttai­guin ja gelddolaš šuoŋaiguin. Eahpitkeahttá šaddá vejolaš sihke sugadit, dánssodit ja lávlut go sii bohtet Gállogieddái, dadjá Guttorm.

 

Márkomeannu lágiduvvo ­suoidnemánu 25.- 28. beivviid Gállogiettis, Evenesmárkkus, Nordlánddas.

Ovdasiiddus dál