Mannan vahkkoloahpa lágiduvvui «Kåfjordpilken» oaggungilvu Guolášjávrris. Buot vuorbbit ledje vuvdon vahkku ovdal gilvvuid ja váldovuoitu manai Romssa gávpogii.
«Kåfjordpilken» oaggungilvu lihkostuvai bures vaikke dálkediehttit ledje einnostan heajos dálkki.
Lágideaddjit dieđihit ahte lei dohkálaš dálki ja ahte birrasii 800-900 olbmo ledje boahtán Guolášjávrái, Gáivutnii.
Ledje eanaš guovllu olbmot geat faskejedje vuoittuid oaggungilvvus:
Stuorámus guolli lei 509 grámma ja vuoiti Arne Solheim (Omasvuotna) oaččui 12 000 ruvnnu.
Nubbin stuorámus guolli lei 434 grámma ja vuoiti Lars Morten Gundersen (Birtavárri) oaččui 6000 ruvnnu.
Goalmmát stuorámus guolli dettii 166 grámma ja Mats Monsen (Birtavárri) vuittii 3000 ruvnnu dan ovddas.
107 máná
Eai goassege ovdal leat «Kåfjordpilken» mánáidoasis leamaš nu olu oasseváldit go dán jagi, oktiibuot 107 máná serve.
Margareth Nilsen gottii stuorámus guoli ja vuittii 4000 ruvnnu.
Nubbin stuorámus guolli dohppii Ulrik Sveen vuggii ja dáinna vuittii son 2000 ruvnnu.
Nikolay Isaksen ges faskii 1000 ruvnnu vuoittu go gottii goalmmát stuorámus guoli.
Buot mánát ledje maid mielde vuorbádeamis vuoitit iPada. Matheo Mikkelsen lei lihkkoš ja vuittii dán.
Skohter váldovuoitun
«Kåfjordpilken» oktavuođas vuvdet maiddái vurbbiid.
– Maiddái dán jagi vuvddiimet buot vurbbiid ovdal go oaggungilvvut lágiduvvojedje. Mis leat áŋgiris loaddavuovdit, muitalit lágideaddjit.
Indre Kåfjord IL lágida oaggungilvvuid ja dieđihit ahte dán jagi váldovuoitu manai Romsii:
1. vuoitu: Skidoo Renegade 600 ACE ja Tysse goallosvovdna, árvu: 140 700 ruvnnu:
John Pettersen, Romsa
2. vuoitu: Wonderland Diamante 150 cm govddu duppalseaŋga, árvu: 31 848 ruvnnu:
Mikkel Isak Kemi, Guovdageaidnu
3. vuoitu: Lappland House lustavisti, árvu 30 000 ruvnnu.
Terje Næss, Hámmárfeasta
4. vuoitu: Lappland House lustavisti, árvu: 30 000 ruvnnu.
Sonja Niva, Sámmolvárri
5. vuoitu: Cruisemátki guovtti olbmui Caribienii, árvu: 27 500 ruvnnu.
Tor Håkon Isaksen, Biežavággi/Romsa
6. vuoiti: Ráissagoahti, árvu: 16 800 ruvnnu.
Inga Anne M Juuso, Guovdageaidnu.
7. vuoitu: Skohtergielká, árvu: 5950 ruvnnu.
Hanne Sofie Kenta, Omasvuotna
8. vuoitu: Birtavári Joker skeaŋkakoarta, árvu: 5000 ruvnnu.
Mikael Grumstedt, Giron/Ivgu
