-Almmuhus-
OĐĐASATSoahpan ollu čuoggáid boazodoallolágas

Soahpan ollu čuoggáid boazodoallolágas

-

-

Sámediggeráđđi Silje Karine Muotka lea duhtavaš go stáhta čájeha beroštumi sámi láhkalávdegotti bargui boazodoallolága rievdademiid oktavuođas.

– Mun lean hui duhtavaš go Eanadoallo- ja biebmodepartemeanta (EBD) dál áigu vuordit sámi láhkalávdegotti barggu ja sin rávvagiid, ja go departemeanta dadjá ahte sii árvvoštallet lávdegotti evttohusaid boazodoallolága rievdadeami oktavuođas, dadjá sámediggeráđđi Silje Karine Muotka preassadieđáhusas.

Sámediggi ja departemeanta leat konsultašuvnnain departemeantta evttohusa birra boazodoallolága rievdademiid oktavuođas soahpan ollu čuoggáid, earret eará ahte evttohus ulbmilparagráfa lága rievdadeamis ii ovddiduvvo stuorradiggái meannudeapmái.

– Mun lean duhtavaš dainna, go evttohus mii lei ovddiduvvon ii váldán dohkálaččat vuhtii dan ahte boazodoallu lea álgoálbmotealáhus, iige dan ahte kultuvrralaš ceavzilvuohta lea seamma deaŧalaš go ekonomalaš ja ekologalaš ceavzilvuohta, dadjá Muotka. Deaŧalaš lea ahte boazodoallostivrras lea duohta mielváikkuhanvejolašvuohta.

 

Duhtavaš

Evttohus ahte rievdadit § 71 boazodoallostivrra birra ii ge ovddiduvvo meannudeapmái dan hámis go lei evttohuvvon.

Dáinna lea Sámediggi maiddái hui duhtavaš.

– Mii áigut dallánaga geahčadit movt sáhtášii sihkkarastit doaibmi boazodoallostivrra. Dan geažil go galget čađahuvvot proseassat dainna mihttomeriin ahte sihkkarastit ahte boahtteáiggis deattuhuvvo ahte lea duohta mielmearrideapmi boazodoallostivrras ja ahte stivrajođiheaddjis lea gelbbolašvuohta boazodoalus, máhttu sámi servodaga ja giela birra, dadjá Muotka.

 

Persovdnadiehtosuoji vuhtii váldin boazologu almmuheami oktavuođas

Sohppojuvvon lea ahte boazolohku siidaosiin siskkáldasat orohagas sáhttá almmuhuvvot jos persovdnadiehtosuodji gozihuvvo. Sámediggi oaivvilda ahte dát lea dakkár diehtu man eatnašat orohagain dihtet geavahusplánaid ja orohatplánaid bokte.

Dain oktavuođain goas buot siidaoasit eai leat ovddastuvvon orohatstivrras sáhttá dát várra leat hástalussan, ja go boazologus lea ollu dadjamuš doarjagii, de lea Sámediggi dohkkehan ahte sáhttá rahpat vejolašvuođa hábmet gohččosa movt dát galgá dahkkojuvvot.

Sámediggeráđđi deattuha ahte ii leat sáhka das ahte dán lágan diehtu galgá buktojuvvot albmosii dahje olggobeallái orohaga.

– Mii áigut konsulteret dán gohččosa hábmemis sihkkarastin dihtii ahte persovdnadiehtosuodji gozihuvvo, dáhkida Muotka.

 

Eai leat soahpan bákkolaš indiviidamerkemis

Ii leat sohppojuvvon evttohusa ektui mas departemeanta háliida geavahišgoahtit bákkolaš elektrovnnalaš merkema.

Sámediggi oaivvilda ahte árbevirolaš merken lea kultuvrralaš ceavzilvuođa guovddáš oassi boazodoalus, ja ahte bohccuid merken ja árbevirolaš mearkavuogádat lea danlágan máhttu maid ferte gozihit ja nannet boahtteáiggis.

Sámediggeráđđi oaivvilda ahte árbevirolaš merken ferte leat váldonjuolggadus boazodoallolágas, ja áigu čuovvulit ášši Stuorradikkis, ja dasto viidáseappot vejolaš gohččosa hábmemis.

– Mii registreret ahte EBD áigu bidjat bákkolaš duppal mearkavuogádaga, mii buktá liigebarggu ja vejolaččat liigegoluid ealáhussii. Min ulbmil lea gozihit ja nannet árbevirolaš merkema, ja nie garvit goluid maid lassemerken buvttášii ealáhussii, loahpaha Muotka.

-Almmuhus-