-Almmuhus-
-Almmuhus-
-Almmuhus-
OĐĐASAT– Mun háliidan leat olles Suoma Europarlamenttár

– Mun háliidan leat olles Suoma Europarlamenttár

-

-

Eurohpá parlameantta dálá lahttu Nils Torvalds álggahii Ohcejogas iežas EU-válgakampánnja mannan lávvordaga. – Mun háliidan leat olles Suoma Europarlamenttár, lohpidii son.

– Háliidan leat boahtteáiggisge olles Suoma Europarlamenttár, dadjá Torvalds preassadieđáhusas.

Dán dáhtu symbolan lea kampánja dovdocealkka «Hankos gitta Ohcejohkii».

Son lohká iežas viggan maŋimus čieža jagis vuhtiiváldit olles Suoma, ja Eurohpá oktasaš ovddu.

– Háliidan maiddái boahtte­áiggis, seammá movttain ja iluin, ovddidit dakkár mearrádusaid dahkama mii vuhtiiváldá nu Ilomantsa mehciid go Eckerö guollešaddadanlágádusaid. Suomas ii leat oktage guovlu gosa Europarla­meantta mearrádusat eai guoskka. Dán hástalusa vuostáiválddán, ja háliidan joatkit barggu dan ovdii, lohká Nils Torvalds preassadieđáhusas.

 

– Lea leamaš ovddasvástádus biras- ja dálkkádatmearrádusaid dahkamis

Preassadieđáhusas čállá ahte ­vihtta jagi dassái lei son logát čađamannan evttohas EU-válggain.

– Dat lea mu ulbmilin maiddái dán háve, dán stuorra mearrádusaid ja máŋggaid lihkostuvvan áššiid áigodaga maŋŋá. Buot Suoma golmmanuppelot áirasis lea mus leamašan stuorámus vástu parlameantta biras- ja ­dálkkádat­ mearrádusaid dahkamis, ­muitala Torvalds.

 

Lea leamaš mielde measta buot stuorra láhkaevttohusain

Torvalds lea ge leamaš Europarla­meantta lahttu jagis 2012:s ja lea doaibman jagi 2017 rájes liberála ALDE-joavkku várreságadoallin.

Europarlameanttas Torvalds lea leamaš mielde measta buot stuorra láhkaevttohusain, mat gieđahallet dálkkádatrievdama, ja váldán ovddasvástádusa liberála ALDE-joavkku ráđđádallan­ulbmiliin.

Dán lassin son lea vástidan máŋgga láhkaevttohusas, mat guske stabiliserema báŋkokriisa maŋŋá.

Son lea maiddái bargan EU bušeahtta- ja guolástangažaldagaiguin.

 

– Mii fertet nagodit čohkket ja ovttastit parlameantta

Preassadieđáhusas daddjo viidáseappot ahte Europarlamenttár Nils Torvalds lea bargan buori ovttasbarggu sihke bellodat- ja kulturrájiid badjel ja menestuvvan dain.

– Persovnnalaš ja politihkalaš oktavuođat, sihke dáidu ráđđádallat doaibmi kompromissaid, bohtet leat guovddážis boahttevaš áigodagas EU-parlameanttas. Muhtin populisttalaš lihkadusat, olgeš- ja gurutlihkadusain, figget ávkkástallat juohke áidna áššálaš parlameantta eahpesihkkarvuođa diliin. Dan dihte mii fertet nagodit čohkket ja ovttastit parla­meantta jierbmámus ovddas­teddjiid, Torvalds deattuha vel preassadieđáhusas.

-Almmuhus-