Guokte dievddu leaba áššáiduhtton go navdet sudno goddán 40 jahkásaš dievddu Donjevuonas dán vahkkoloahpa. Sihke son gii goddui ja soai geat leaba áššáiduhtton goddináššis leat Islándalaččat.
Politiijat áigot mánnodaga gáibidit goappašagaid biddjot rájusgiddagassii, nuppi njealji vahkkui ja nuppi ges vahkkui, reivvestallan ja galledangildosiin.
Dutkama oktavuođas galget maid gozihit dan ovtta áššáiduhtton dievddu, ja šaddá judisiealla goziheapmi.
– Lea ain ollu dutkat, sihke teknihkalaččat ja taktihkalaččat. Teknihkalaš guorahallamis lea Kripos veahkkin Finnmárkku kriminálateknihkkariidda, čállá Finnmárkku politiijaguovlu preassadieđáhusas.
Áššáiduhtton dievdduid bealušteaddjit leaba Jens B. Herstad ja Vidar Zahl Arntzen, Ávvir ii leat fáhten sudno ságaide dán áššis.
Dáhpáhus
Lávvordat čuovganeapmái bođii Finnmárkku politiijaguvlui diehtu diibmu 05.27, ahte muhtin dievdu lei báhččon Donjevuonas, mii lea Gáŋgaviika gielddas Finnmárkkus.
Politiijat gávdne dievddu gii lei bahut roasmmohuvvan, muhto eai nagodan gádjut su heakka.
Dievdu lei 40 jahkásaš gii ásai Donjevuonas.
Sullii diibmobeali maŋŋel go politiijaide bođii diehtu dáhpáhusa birra, de bođii maid diehtu ahte okta biila mas guokte olbmo ledje, lei čálistan badjel luotta Donjevuonas.
Seammás ledje politiijat ožžon dieđuid guovtti dievddu birra geat leigga vázzilan eret báikkis gos goddon dievdu gávdnui.
Rájusgiddagassii
Lávvordaga sullii diibmu 10.50 válde politiijat gitta guokte dievddu Donjevuonas.
Dáhpáhusas ii lean politiijaid dieđuid mielde stuora dramatihkka.
Politiijat válde gitta guokte dievddu geat leaba 32 ja 35 jagi boarrásat.
Mánnodaga gohččot politiijat sudno biddjot rájusgiddagassii.
Politiijaid kriminálateknihkkárat leat jođus teknihkalaš guorahallamiin.
Sihke gottáhallan dievdu ja áššáiduhtton dievddut leat Islándalaččat.
Politiijat navdet nuppi dan áššáiduhtton dievddu leat váldosivalažžan áššis, ja nubbi lei mielde váikkuheame dáhpáhusa.
Son lea čilgen dáhpáhusa politiijaide, ii ge mieđit iežas sivalažžan áššáiduhttimii.
Obdukšuvdnii
Go politiijaide boahtá formála diehtu ahte lagamuččat Islánddas leat ožžon dieđu, de áigot almmuhit nama jápmán dievddus.
Jápmán dievdu sáddejuvvo obdukšuvdnii Romsii.
– Dievdu gean balahit váldosivalažžan leat, ii leat vel háliidan gažaduvvot dáhpáhusa birra. Politiijat plánejit gažadit goappašagaid dán vahkus, dieđiha politiijaadvokáhtta Anja M. Indbjør preassadieđáhusas.
– Lei gildojuvvon lahkonit dievddu
Sihke jápmán dievddus ja balahuvvon váldosivalaččas lei relašuvdna.
Áššáiduhtton dievdu lea ovdal áitán su gii lea jápmán.
Politiijat ledje dutkame áitagiid, ja dan oktavuođas leaba goappašagat gažaduvvon politiijaide.
– Daid áitagiid dihte maid áššáiduhtton dievdu lei cealkán, de lei son cuoŋománu 17.beaivvi rájes gildojuvvon lahkonit dievddu gii dál lea jápmán. Son lei ožžon dan dieđu telefovnna bokte. Áššáiduhtton dievdu ii leat vel gažaduvvon, muhto politiijat eai sáhte duođi eanet muitalit áitagiid birra go váldet vuhtii dutkama.
Eará mediat čállet ahte 40-jahkásaš gottáhallan dievdu ja 35-jahkásaš gii lea áššáiduhtton, leaba vieljažagat.
