Almmuhus

Almmuhus

Deanu­čázádaga Guolástan­hálddahus searvá Luossa­konferánsii Romssas

Deanučázádaga Guolástanhálddahusa ráđđeaddi, Narve Stubbraaten Johansen. Govva: Astrid Helander

Deanučázádaga Guolástanhálddahus (DG) dieđiha sii servet maid luossakonferánsii seamma láhkai go Sámediggi. – Mii válljiimet guokte DG miellahtu geat galgaba oasálastit, lohká DG ráđđeaddi Narve Stubbraaten Johansen.

Almmuhuvvuon: 
Bearjadat, 12 Cuoŋománu, 2019 - 14:46
Fáddásánit: 

Diibmá mearridedje riikkaidgaskasaš organisašuvnnat, mat barget luossašlájaid gáhttenbargguid miehtá máilmmi, ahte jahki 2019 galgá Riikkaidgaskasaš luossajahki. Davvi-Atlántta Riikkaidgaskasaš luossagáhtten- ja hálddašanorgána North Atlantic Salmon Conservation Organization (NASCO) čoahkkinastá Romssas geassemánu 5.-7. beaivvi dán jagi.

Dan oktavuođas lágida maid NASCO riikkaidgaskasaš luossasymposia dahje čoahkkima geassemánu 3. ja 4. beaivvi Ishavshoteallas Romssas. 

Norgga sáttagotti jođiha Birasdirektoráhtta mii ovttasbargá NASCO:in ovttasráđiid Romssa fylkkamánniin.

– Deanučázádaga Guolástanhálddahus (DG) digaštalai dán ášši mannan čoahkkimis ja mii válljiimet guokte DG miellahtu geat galgaba oasálastit. Mii leat maid ohcan akkrediterema NASCO-čoahkkimii mii lágiduvvo geassemánu 5.-7. beaivvi. Eará sániin, de leat mii ohcan Non Governmental Organization (NGO) stáhtusa nu mo Sámediggi lea dahkan, muitala DG ráđđeaddi Narve Stubbraaten Johansen Ávvirii. 

Non Governmental Organization (ii stáhtalaš organisašuvdna) lea oktasaš namahus organisašuvnnain mat barget riikkaidgaskasaš doaimmain, maiddái ealáhus- ja fágaorganisašuvnnat. 

 

Sámediggi maid searvá

Sámediggi dieđiha iežas ruovttusiiddus ahte Sámediggi maid searvá dan luossasymposiai.

Sámedikkis lea goziheaddjestáhtus. Sámediggepresideanta Aili Keskitalo logaldallá symposias.

Sámediggi lea goziheaddji NASCO-čoahkkimis. 

 


Luosat (Salmo salar) vuojadit jogas. Vuorkágovva: Orell Panu

 

Ovdasiiddus dál