Guovttis Sosiálisttalaš Gurutbellodagas (SG) evttoheaba našunála muitobácci cegget Stuoradikki olggobeallái, Eidsvoll sadjái, muitun sidjiide geat nealgudemiin vuosttaldedje Álttájoga huksema 1979:s.
Guovttis Sosiálisttalaš Gurutbellodagas (SG) evttoheaba našunála muitobácci cegget Stuoradikki olggobeallái, Eidsvoll sadjái, muitun sidjiide geat nealgudemiin vuosttaldedje Álttájoga huksema 1979:s.
Čakčii lea 40 jagi áigi go čieža sápmelačča ceggejedje lávu ja álggahedje nealgudeami Stuoradikki luhtte Oslos.
Nealgudeapmi vulggii demonstrašuvnnas Álttás, go áigu reguleret Álttá-Guovdageainnu, čállá NTB.
Dehálaš muitit
Stuoradiggeáirasat Kari Elisabeth Kaski ja Lars Haltbrekken SG bellodagas oaivvildeaba ahte dat sámi vuosttaldeapmi ii galgga vajálduvvot, ja soai evttoheaba cegget muitobácci Eidsvoll sadjái mii lea Stuoradikki olggobealde, čállá Klassekampen aviisa.
– Dat ferte leat našunála muitobázzi danne go nealgudeamis ledje máŋga stuora vuoittu main lea našunála mearkkašupmi, lohká Kaski avisii.
Haltbrekken lohká dehálažžan ahte boahtte buolva ii vajáldahte Álttáášši ja dan bohtosiid.
SG evttoha muitobácci Stuoradikki presideantagoddái, ja ahte lea sámi dáiddár gii oažžu barggu doaimmahit dan.
Vuoitun sámiide
Lávus šattai stuora symbolalaš fápmu Stuoradikki olggobealde 1979:s, go okta joavku sápmelaččat bohte nationálačoahkkimii ja geigejedje reivve stáhtaministtarii Odvar Nordlii, mas gáibidedje heaittihit Álttájoga huksenbarggu, čállá NTB.
Dat mii álggii birasakšuvdnan loahpahuvvui vuoitun sámi rivttiid ovddas. Ovdal go nealgudeapmi loahpahuvvui, lohpidii stáhtaministtar Odvar Nordli ahte sámi rievttit galget čielggaduvvot. Sámevuoigatvuođalávdegoddi ásahuvvui, mas ledje iešguđetlágan fágačeahpit mielde, ja boađusin šattai loahpas ahte Sámediggi rahppui 1989:s. (©NTB)
