Almmuhus

Almmuhus

Dál beassá fas sáddet boazodoallo­dieđáhusa elektrovnna­laččat

GEAVAHAN OLLU NÁVCCAID: Dál besset boazosápmelaččat fas sáddet boazodoallodieđáhusaid elektrovnnalaččat, go Eanandoallodirektoráhtta lea viimmat nagodan ráhkadit buoret čovdosa, mii ii suođa almmolašvuhtii olbmuid priváhta dieđuid. Čájáhusgovva: Nils Johan Vars

Eanandoallodirektoráhtta lea dál ráhkadan ođđa digitála skovi boazoeaiggádiidda geat galget sáddet boazodoallodieđáhusaid ja ohcat doarjagiid.

Almmuhuvvuon: 
Bearjadat, 15 Njukčamánu, 2019 - 08:45
Ođastuvvon: 
Ođastuvvon: 15.03.2019 - 19:09
Fáddásánit: 

Guokte jagi dás ovdal šattai Eanandoallodirektoráhtta giddet dalá digitála bálvalusa boazodolliid váste go olbmuid dieđuid besse eará olbmot oaidnit.

Dát ášši beakkehii 2017:s, go Boazodoallodieđáhusa deavddidettiin oaččui Nancy Charlotte Porsanger Anti dieđuid mat eai sutnje gula.

Su dihtoršerbmii ihte amas olbmo persovdnanummar ja kontonummar.

Dan geažil šattai hirbmat riedja go Eanandoallodirektoráhtta ii buorebut gáhtten olbmuid priváhta dieđuid, nu go personnummariid ja kontonummariid mat lea hui sensitiiva dieđut maid sáhttet geavahit boastut jus dat gevvet vearredahkkiid háldui.  

 

Váiddii ášši Diehtobearráigehččui

Son muitalii ahte lei vásihan vaikke makkár meattáhusaid jahkeviissaid, muhto ihte fas vierrolbmuid persovdnadieđut su skovvái, de gal váiddii ášši Diehtobearráigehččui.

Dan geažil šattai Eanandoallodirektoráhtta giddet siiddu, go eai máhttán divvut prográmma vai leat lágaid siskkobealde.

Dalle dajai Nancy Porsanger Anti Ávvirii, ahte ulbmil váidimiin lei oažžut eret dan heajos čovdosa mas ledje nu olu váilevašvuođat. 

 

Sihkar ja álki

Dál lea direktoráhtta almmuhan, ahte sis lea dál ođđa čoavddus sajis, ja nu besset boazosápmelaččat fas sáddet boazodoallodieđáhusaid elektrovnnalaččat. 

Eanandoallodirektoráhtta dieđiha preassadieđáhusas, ahte sii leat vuoruhan bargonávccaid oažžut sadjái ođđa digitála bálvalusa ovdal go boazosápmelaččat galget dán giđa sáddet boazodoallodieđáhusaid ja ohcat doarjagiid.

– Mii lea vuoruhan dan barggu, ja lean movttat go sáhttit fállat boazoeaiggádiidda digitála bálvalusa mas dáhkiduvvo sihkarvuohta mii gáibiduvvo, dadjá Eanandoallodirektoráhta hálddahusdirektevra Jørn Rolfsen preassadieđáhusas. 

 

Dehálaš áigemearit

Eanandoallodirektoráhtta lea dál juo rahpan ođđa digitála čovdosa, ja áigemearri sáddet sisa boazodoallodieđáhusa lea cuoŋománu 10. beaivvi. 

– Dáinna ođđa digitála čovdosiin šaddá maid ollu álkibun raporteret ja ohcat, dadjá Jørn Rolfsen. 

Digitála skovi mainna siidaoasit ja boazosearvvit ohcet doarjagiid sáhttá geavahišgoahtit cuoŋománu 24. beaivvi rájes, ja ohcanáigemearri lea miessemánu 31. beaivi.

Goappašat skovit leat sihke davvisámegillii ja dárogillii.

 

Ovdasiiddus dál