Davvi-Norgga dáiddamusea čájeha sámi dáidaga Svalbárddas vuosttaš gearddi ja sávvet dan áŋgiruššat sihke guovllu ássiid ja mátkkálaččaid.
Davvi-Norgga dáiddamusea čájeha sámi dáidaga Svalbárddas vuosttaš gearddi ja sávvet dan áŋgiruššat sihke guovllu ássiid ja mátkkálaččaid.
Lávvardaga guovvamánu 23. beaivvi rahppo «Luottat» dáiddačájáhus Longyearbyenis, Svalbárddas.
Davvi-Norgga dáiddamuseas leamaš sierra Dáiddahálla Svalbárdda museas 2015 rájes ja dál leat vuorkkás roggan sámi dáidagiid ja dujiid.
– Sámi dáidda lea miehtebiekkas ja olbmot háliidit dan oaidnit, danin háliidit mii fállat sámi dáidaga maiddái Svalbárdda ássiide ja turisttaide, dadjá Davvi-Norgga dáiddamusea gulahallanbargi Kjetil Rydland.
– Dán čájáhusa oktavuođas leat beassan roggat vuorkkáid ja geahčadit makkár sámi dáidda ja duodji mis gávdno. Lea hui dehálaš lágidit dákkár čájáhusaid vai olbmot besset dan oaidnit ja vásihit. Min museas ii čága oainnat buot čájehit ja danin vurkkoduvvojit vuorkkás, dadjá Davvi-Norgga dáiddamusea kuráhtor Charis Gullickson.
Govven: Davvi-Norgga dáiddamusea
Áŋgiruššan
Masá miehtá Arktisa ásset álgoálbmogat, muhto eai fal Svalbárddas.
Danin leat Davvi-Norgga dáiddamuseas gealdagasas oaidnit man láhkai doppe váldet vuostá sámi dáidaga.
– Mu dieđuid mielde čájehuvvo olles sámi dáiddačájáhus vuosttaš gearddi Longyearbyenis. Mii sávvat ahte dát áŋgiruššá olbmuid ja ahte dat boktá ságastallamiid. Sámi dáidda han čalmmustahttá dehálaš álgoálbmot áššečuolmmaid ja dát soitet maiddái áigeguovdilat Svalbárddas vaikke doppe eai ása álgoálbmogat, dadjá Rydland.
Ivvár Ivvár guovddážis
«Luottat» čájáhusas leat oktiibuot 14 dáidaga, ja olbmot besset oaidnit sihke historjjálaš ja dálá áiggi dáidaga ja duoji.
– Iver Jåks dáidda «Friddja rekonstrukšuvdna guovtti installašuvnnas» lea guovddážis dán čájáhusas. Rahpamii cegget ieža installašuvnna„ muhto čájáhusáigodagas váldo dáidda moddii vulos. Irene Snarby, guhte lea čállimin doavttergráda Jåks barggu birra, galgá oktii cegget installašuvnna ja dan maŋŋel áigut hástalit skuvlaluohkáid ja earáid. Iver Jåks lávii ieš maid hástalit olbmuid searvat iežas dáiddabargui, čilge Gullickson.
Maiddái John Savio, Hans Ragnar Mathisen, Synnøve Persen, Arnold Johansen, Anders Savio, Lars Pirak, Maja Dunfjell ja John Andresen dáidagat ja duojit leat oaidninláhkái Svalbárddas dáiddačájáhusas mii bistá geassemánu 1. beaivái.
