Almmuhus

Almmuhus

Sundance Instituhtas ođđa ovttasbargo­guoimmit Sámis

OVTTASBARGU: ISFI Direktevra Anne Lajla Utsi ja Sundance Instituhta álgoálbmotprográmma direktevra N. Bird Runningwater almmuheigga AIFF-ovttasbarggus bearjadateahkedis Berlinas. Govven: Stine Oppegaard.
Bearjadaga almmuhuvvui Internašunála Sámi Filbmainstituhta ja Sundance Instituhta álgoálbmotprográmma  ođđa ovttasbargu mii galgá nannet árktalaš álgoálbmot filmma.

– Internašunála Sámi Filbmainstituhtas lea illu almmuhit, ahte Sundance Instituhta álgoálbmotprográmma (Sundance Institute Indigenous Program) searvá ovttasbargoguoibmin ISFI asáhan AIFF – Árktalaš álgoálbmogiid filbmafondii, čállá ISFI preassadieđáhusas man almmuhedje mánnodaga guovvamánu 11. beaivvi.

Sundance Instituhtta fállá vejolašvuođaid čájehit ja ovddidit teáhter- filbma- ja digitála mediabargiid buktagiid, mii šaddá ávkin árktalaš álgoálbmogiid filmma nannemis.
 

Almmuhedje ovttasbarggu

ISFI Direktevra Anne Lajla Utsi ja Sundance Instituhta álgoálbmotprográmma direktevra N. Bird Runningwater almmuheigga AIFF-ovttasbarggus Sámi resepšuvnnas, mii lágiduvvui bearjadateahkedis European Film Marketis ja 69. Berlinale-filbmafestiváliin.
 
Árktalaš álgoálbmogiid filbmafoanda (AIFF) lea iešheanalaš ruhtadan-, ovttasbargobuvttadan- ja juogadanovttasbargoguoibmi árktalaš álgoálbmot filbmadahkkiide miehtá árktalaš guovllu.

Foandda ulbmil lea ovdanbuktit alla dási árktalaš álgoálbmogiid prošeavttaid ja ovttasbargobuvttademiid, mat čalmmustahttet álgoálbmogiid kultuvrraid, gielaid ja servodagaid.

 

Sávvet Sundancii bures boahtin filbmafondii

Sundance Instituhtta lea nonprofit-organisašuvdna, man ulbmil lea doarjut álgoálbmogiid jiena ja gávnnahit ja ovddidit álgoálbmot dáiddariid ja publikuma.

Sundance Instituhta iešguđetlágan prográmmaid ulbmil lea nannet ja movttiidahttit iehčanas filbmasuorggi, mediija- ja teáhterbargiid buvttademiid Amerihká ovttastuvvan stáhtain ja miehtá máilmmi.


BURES BOAHTIN: ISFI Direktevra Anne Lajla Utsi sávvá Sundance Imstituhttii bures boahtima filbmafondii.  Preassagovva: Jan Kraus

 

– Mii sávvat Sundance Instituhttii bures boahtima filbmafondii. Dát ovttasbargu lea stuorra lávki árktalaš álgoálbmot filbmadahkkiide. Sundance Instituhtta lea okta deháleamos filbmaasáhusain, mii lea juo álggu rájes dovddastan álgoálbmogiid ja sin čehppodaga, lohká ISFI direktevra Anne Lajla Utsi ja joatká:

– Mii leat hui movttegat dán ođđa internašunála ovttasbarggus, mainna árktalaš álgoálbmotfilbma šaddá boahtevuođas olahit nana sajádaga máilbmeviidosaš filbmabirrasis.

 

Internašunála Sámi Filbmainstituhtta

Internašunála Sámi Filbmainstituhta višuvdna lea addit sámi álbmogii gelbbolašvuođa ja buoret ekonomalaš vejolašvuođaid ovddidit, buvttadit ja čájehit iežaset filmmaid sámegillii.

Dasa lassin ISFI galgá ovddidit álgoálbmot filmmaid ja álgoálbmot filbmabargiid ovttasbarggu máilmmeviidosaččat.

 

Sundance Instituhta álgoálbmotprográmma

Sundance Instituhtas leat iešguđetlágan prográmmat, mat čalmmustahttet sihke ruđalaččat ja kreatiivvalaččat doarjut iehčanas filbmasuorggi álgoálbmot dáiddáriid.

Sundance Instituhta álgoálbmotprográmma ulbmilat leat gávnnahit ja skuvlet čuovvovaš sohkabuolvva álgoálbmotjienaid ja fállat sidjiide vejolašvuođaid ovddidit filbmaprošeavttaid ja buktit dáiddáriid ja sin buktagiid ruovttoluotta álgoálbmotguovlluide.

Sundance Instituhta viggamuš lea álgoálbmotprográmmain nannet álgoálbmot filbmadahkkiid ja servodagaid iešstivrejumi.

Ovdasiiddus dál