Almmuhus

Almmuhus

– Lean hirbmat ilus

Sápmelaš girječálli, Inga Ravna Eira, lea evttohuvvon oažžut Davviriikkaid Ráđi 2019 girjjálašvuođa bálkkašumi, iežas diktagirjjiin «Ii dát leat dan eana».

Almmuhuvvuon: 
Duorastat, 21 Guovvamánu, 2019 - 15:32
Ođastuvvon: 
Ođastuvvon: 21.02.2019 - 15:41
Fáddásánit: 

Sámi girječálli Inga Ravna Eira muitala son lea hirbmat ilus ja lea leamaš hui gealdagasas dan rájes go beasai diehtit dan moadde beaivvi dás ovdalis.

 

Davviriikkaid Ráđi čállá ná:

Diktačoakkáldagas «Ii dát leat dat eana» leat dálkkádatrievdamat fáddán.

Dat mii dahká divttaid nu áidnalunddogin, lea girječálli lahkavuođa luondduin ja mo son čalmmustahttá daid nana dovdduid čállima bokte.

Juohke diktii leat čadnon eallinvásáhusat, erenoamáš sátneriggodat ja dálkkádatdoahpagat mat leat jávkamin dálááiggi sámegielas.

Dán girjji ii livčče juohkehaš sáhttán čállit gos ihkinassii, muhto girječállái gii 70 jagi lea juo vásihan sámi kultuvrra ja geas lea máhttu ja vásáhusat čadnon dálkkádahkii ja mo dálki lei ovdal ja mo dat lea rievdan.

Girječálli čalmmustahttá dan ovdamearkkaiguin máŋgalogi jagi dás ovdalis dálážii, ja son guhte dovdá kultuvrra, lea oahpes ášši mo olbmot elle ráfis luonddus, eaige soahtan dan vuostá.

Ieš giella ja doahpagat gáibidit vuđolaš kulturmáhtt maiddái lohkkis.

Sápmelaččain lea nu mo inuihtain, rikkis giella mii govve muohtaga, mo dat lea ja daid kvalitehtaid.

Muohta ja guohtundilálašvuohta lea dehálaš vuođđoealáhusas, boazodoalus, ja girječálli lea nagodan čuvget olu daid diliid iežas vuđolaš máhtu, lagašvuođa ja ráhkisvuođa bokte kultuvrii.
 

Girjjis čatná olbmuid daguid ja sisabahkkemiid lundui dán áiggi sápmelačččaid dolos sámi vuoiŋŋaide, eatnanvárjaleddjiide, olbmuide ja ieš eallimii.

Divttaid bokte gullo Uksáhká heakkaheađálaš huikasa Beaivváža mánáide, dálááiggi olbmuide eatnanspáppas, geat eai su šat guldal.

Dás dovdo sihke ballu boahtteáigái ja ipmilballu eamiálbmogiid vuoiŋŋaide.

Makkár máilmmi árbejit iežamet maŋisboahttit mis, ja maid dajašedje vuoiŋŋat jus dieđašedje dálááiggi olbmuid birra ja mo lea eatnama rievdadan?

Go eana ii leat nu mo oktii lei?

Girjji divttat čájehit ja gáibidit čielga máhtu eamiálbmogakultuvrii, ii ge dušše dieđu dasa.

Dát addá girjái čiekŋalit perspektiivva go dan maid fáhte vuosttaš lohkamis.

Dálkkádatrievdan lea áigeguovdilis fáddá, ii dušše sámi kultuvrras, muhto maid buot eamiálbmogiid kultuvrras Davviriikkaid oktavuođas, nu mo jehkiid suddamat mat eai dušše váikkut davviguovlluide, muhto mat sáhttet buktit ilgadis váikkuhusaid olles máilbmái.

Mathis Nango alihasti govvádusat nanosmahttet girjji sáttasáni mii lea sihke girjjálaččat ja dáiddalaččat.

Girjjis lea hirbmat áigeguovdilis fáddá mii lea mielde ovddideamen beroštumi sámi kultuvrii ja sámegillii.

Min mielas lea Inga Ravna Eira, okta dain boarrasamos sámi girječálliin, čállán allakvalitehta girjjálašvuođa girjji Uksáhká heakkaheađálaš huikasa, ja danin oaivvildat mii ahte dát áidnalunddot sámi girjjálašvuohta ánssáša oažžut Davviriikkaid Ráđi 2019 girjjálašvuođa bálkkašumi!
 

Ovdasiiddus dál