«Paradise hotel» ja «Farmen-kjendis» beakkálmas, divttasvuotnalaš Erik Anders Sæter (22), lea ráhkadišgoahtán musihka ja lea dál almmuhan iežas vuosttaš lávlaga.
«Paradise hotel» ja «Farmen-kjendis» beakkálmas, divttasvuotnalaš Erik Anders Sæter (22), lea ráhkadišgoahtán musihka ja lea dál almmuhan iežas vuosttaš lávlaga.
Erik Anders Sæter lea Erlend Elias Bragstad unnavieljaš ja son šattai dovddusin diimmá «Paradise hotel» ráiddus man TV3 sádde jahkásaččat.
ERIK lea su artistanamma ja son lea easkkabáliid almmuhan iežas vuosttaš lávlaga.
Lávlaga namma lea «Ukjent» ja lea gávdnamis earret eará Spotify rávdnjen báikkis.
Lávlla lea njuiken njuolga 28. sadjái Norgga eanemus čuojahuvvon lávlagiid searvvis.
Ráhkisvuohta ja dovddut
Lávlla lea ráhkisvuođa ja dovdduid birra ja Sæter lea čállán lávlaga Hef Augustoin fárrolaga.
– «Ukjent» lávlaga ulbmil lea addit dakkár dovddu mii galgá deaivat buohkaid geat leat dovdan ahte sii eai leat áibbas sihkkarat iežaset dovdduid birra muhtin eará olbmui, dadjá Erik Anders Sæter preassadieđáhusas.
Preassadieđáhusas dieđiha Sæter ahte son lea bargame eambbo musihka almmuhemiin ovdal geasi ja ahte dán jagi mielde galggašii skearru maid leat gárvvis.
Eambbo TV?
Erik Anders Sæter lea dál áigeguovdil «Farmen kjendis» TV-ráiddus, ja Universal Music Norge dieđiha ná preassadieđáhusas:
– Dakkár TV-profiila go Erik Sæter lea, de ii leat jáhkkemeahttun ahte son oidno fas TV:s dán jagi mielde.
De gal sáhttá árvvoštallat ahte Sæter lea oidnomen eambbo TV:s jagi mielde.
