Go pánte bohttaliid, de sáhttá válljet háliida go skeŋket ruhtasupmi Rukses Russii ja seammás searvat vuorbádeapmái mas sáhttá vuoitit ruđa.
Aftenposten lea ságastallan logi olbmuin ja čájehuvvo ahte eatnašat eai dieđe sullii ge man olu manná organisašuvnna doibmii.
35 proseantta ruđas manná vuoittuide, Rukses Ruossa oažžu 32,5 proseantta, Pántalotteriija 22,5 proseantta (Rukses Ruossa eaiggáduššá 40 proseantta das ja Olav Thon Gruppen 60 proseantta) ja 9,75 proseantta manná buvdii mii doaimmaha lotteriija.
Eai rihko njuolggadusaid
Olbmot geaiguin aviisa lea hállan leat hirpmahuvvan, muhto Lotteriijabearráigeahčču vástida ahte Pántalotteriija ii rihko makkárge njuolggadusaid.
– Unnimusat 50 proseantta lotteriijagávppis oktan vuoitosupmiin galgá mannat organisašuvdnii mii lea ožžon lobi lágidit dán. Dat mearkkaša ahte Rukses Ruossa galgá oažžut birrasii 32-33 proseantta bruttobohtosis, čilge Lotteriijabearráigeahču Turid Søgnen.
Dehálaš dienas
Rukses Ruossas vástidit aviisii ahte sáhtášedje šaddat čeahpibun muitalit man olu sii ožžot sisaboađus.
Sii dáhkidit ahte buot ruđat maid ožžot pántamašiinnain mannet sin bargui, báikkálaš searvi, mas pántamašiidna lea, oažžu beali ruđain.
Rukses Ruossa muitala maiddái ahte lotteriija lea okta dain doaibmabijuin mat skáhpot eanemus sisaboađu sidjiide.
