Almmuhus

Almmuhus

Rabai Norgga oasi Grüne Woches

RAHPAMIS: Maiddái sámi fitnodagat, nu mo Skodi Rein, leat Berlinas dál ovddasteamen Norgga. Govven: Vidar Alfarnes/Eanadoallo- ja biebmodepartemeanta

Eanandoallo- ja biebmoministtar Bård Hoksrud rabai bearjadaga norgga oasi Grüne Woche meassuin.

Almmuhuvvuon: 
Lávvardat, 19 Ođđajagimánu, 2019 - 10:12
Ođastuvvon: 
Ođastuvvon: 19.01.2019 - 10:14
Fáddásánit: 

Dán jagi meassuin leat 80 iešguđet biebmo- ja mátkeealáhus buvttadeaddji ja fitnodaga, geat bohtet miehtá Norgga, čállá Eanandoallo- ja biebmodepartemeanta preassadieđáhusastis.

 

– Buoremus buktagat

Grüne Woche lea okta máilmmi stuorámus biebmomeassuin, ja lágiduvvo Berlinas, Duiskkas, jahkásaččat.

– Mun lean oalle sihkar dasa ahte čájeheaddjit ovddastit oasi das mii lea buot buoremus sin guovllui. Lea, ja galgá leat, kvalitehtasteamppal jus válljejuvvo čájeheaddjin norgga oassái Grüne Woches. Dáppe Duiskkas, mii lea okta min deháleamos márkaniin olgoriikkas, galget čájeheaddjit ovddastit Norgga ja iežaset guovllu. Duiskalaš turisttat leat sin searvvis geain lea eanemus beroštupmi Norgga galledit. 2017 logut čájehit ahte buot guovlluin, earret go guovddáš østlánddaguovlluin Norggas, leat duiskalaččat eanetlogus olgoriikkalaš turisttaid gaskkas, logai Hoksru iežas rahpansártnis.

Ealáhussáttagoddi mii čuovvu stáhtaráđi Berlinii, ja olu eará galledeaddjit ledje báikkis go meassut rahppojedje.

Norgga oassálastin Grüne Woche meassuin, galgá leat mielde nannemis norgga biepmu ja mátkehealáhusa beaggima.

Meassut leat maid dehálaš arena dialogii, ođđa politihka ja doaibmabijuid hábmemii eanandoalu, biebmuid ja mátkeealáhusai dáfus.

Ulbmil lea stimuleret ovttasbargui ja ovdáneapmái geográfalaš ja ealáhuslaš rájáid rastá, čálle departemeanta.

 

Sápmelaččat servet

Grüne Woche meassuin leat máŋgii leamašan sápmelaččat ovddasteamen Norgga. Nu leat maid dán jagi.

Fitnodagat mat ovddastit Davvi-Norgga dán jagáš biebmomeassuin leat dát: biebmobuvttadeaddjit, guossoheaddjit, vásáhusfitnodagat ja idjadanbáikkit:

Scandic Hotel Girkonjárga, Myken Destilleri AS, Bark Spiseri & Bar, Juga Mikrobryggeri, Toves Tradisjonsmat, Lyngen Reker AS, Molta AS, Vollan Gjestestue AS, Hrogn AS, Basecamp Explorer Spitsbergen, Lofoten Farm Trail, Inga Sami Siida, Smak Svalbard, Nordtun Gård, Kroglia kulturgård, Matkollektivet i Vikgården / ArktiskMat, Inger og Monikas Gårdsmat, Restaurant Lofotmat, Handelsstedet Forvik, Utværet Lånan, Røstlam, Scandic Vadsø, Dalheim Gård, Refsnes Matglede AS, Biotope, Kranes Kjøkken AS, Arktisk kje AS, Skodi Rein ja Visit Varanger.

Karen Utsi Sara, gii ovttas isidiin jođiha Skodi Rein fitnodaga, logai Ávvirii ná ovdal mátkki:

 – Ulbmil lea oažžut olbmuid boahtit Norgii, ja Skodi Rein lea maid oassin dan márkanastimis, čilge Sara, gii ii loga jurddan ahte olgoriikii ásahit ođđa biergomárkana. 


Eanandoallo- ja biebmoministtar Bård Hoksrud rabai Norgga oasi Grüne Woches, dás lea son fárrolaga Leon Bakkebøain, guhte lea ruhtadandirektevra Innovasjon Norges. Govven: Eanandoallo- ja biebmodepartemeanta

 

Ovdasiiddus dál