Ohcejogas doaibmi sámemusihkkár Anna Näkkäläjärvi Länsmana dahje Ánnámáreha ođđa musihkka doalvu guldaleddjiid govahallon duoddariidda.
Ohcejogas doaibmi sámemusihkkár Anna Näkkäläjärvi Länsmana dahje Ánnámáreha ođđa musihkka doalvu guldaleddjiid govahallon duoddariidda.
Ánnámáret doallá konseartta ođđajagemánu maŋimuš vahkoloahpas eamiálbmogiid filbmafestiválas Skábmagovain, Anáris, dieđihit sii preassadieđáhusas.
– Lea gelddolaš bovdet olbmuid min konsertii go jietnamáilbmi, man mii leat ovttas musihkkáriiguin huksen, buktá mu musihka ovdan aivve ođđa hámis, lohká Anna Näkkäläjärvi-Länsman preassadieđáhusas.
Son lohká maiddái konseartta temá alcces dehálažžan, go das ovdanbuktá iežas jurdagiid modeardna ja árbevirolaš kultuvrra deaivvadeamis.
– Earenoamážit munnje miellagiddevaš lea, ahte manin mis lea dárbu dutkat historjjá ja ruohttasiid. Manin dat lea midjiide dehálaš? Leago dat persovnnalaš dárbu, identitehta huksen vai politihkalašdahku?, suokkardallá Anna Näkkäläjärvi Länsman.
Dološ áigi ja dálá áigi
Näkkäläjärvi-Länsman čilge ahte Nieguid duovdagat -konseartta jietnamáilmmis ovttastuvvet dološ áigi ja dálá áigi.
Mielde leat sihke árbevirolaš ja ođđaáigásaš elemeanttat.
Anna Näkkäläjärvi-Länsmanis, dahje Ánnámárehis, leat čuojaheaddjin Ilkka Heinonen gii čuojaha Suoma álbmotčuojanasa jouhikkosa, ja Turkka Inkilä čuojaha Japána shakuhachi njurggonasain.
Visuála elemeanttat
Árbevirolaš elemeanttat leat ovttastahttojuvvon elektrovnnalaš musihkkii.
Musihka lassin leat mielde vel visuála elemeanttat mat leat anárlaš Marja Viitahuhta videot.
– Ovttas buot dat ságastallet oktasaš globála áiggis ja speadjalastet historjái ja ruohttasiidda, dadjá Ánnámáret preassadieđáhusas.
