-Almmuhus-
-Almmuhus-
-Almmuhus-
KULTUVRALuohti ja kyari-lávlun ovttas Japánas

Luohti ja kyari-lávlun ovttas Japánas

-

-

Mikkel Rasmus Logje ja Katarina Barruk leaba mannan Japanii juoigat ovttas kiyari lávluiguin. Vuosttaščájálmas dán bihtás lea sotnabeaivvi. 

Dán ođđa čájálmasa, masa Beaivváš Sámi Našunálateáhter ja Åarjelhsaemien Teatere leat searvan,  leat gohčodan «Yoik & Kiyari Project 2018».

Dat lea Beaivváža preassadieđáhusa mielde musihkalaš deaivvadeapmi gaskkal luođi ja árbevirolaš Kiyari lávluma, mii boahtá Suwa guovllus, Gaska-Japánis.

 

Luondduoskku lávlunárbevierru

Sámis leat juo mannan dohko, ja sotna­beaivvi skábmamánu 11. beaivvi galgaba guokte nuorra juoigi, lullisápmelaš Katarina Barruk ja davvisápmelaš Mikkel Rasmus Logje, juoiggastit Kiyari-lávluiguin geat bohtet Chino City Kiyari Preservation Society:as.

Kiyari lea duhát jagi boares lávlunárbevierru mii vuolgá jápana luondduoskus, Shinto. Lea rituealla lávlun, ja man lávlot Onbashira festiválas juohke guđát jagi. Doppe njeidet guhttanuppelohkái guosa ja fievr­ridit daid Suwa Taisha bassibáikái, gosa ceggejuvvojit bassibáikki njealji vistái.

Lea joavku, sihke nissonolbmot ja dievdoolbmot, Suwa-guovllus Japánas, geat ain doalahit dán lávlunárbevieru, ii ge dáhpáhuva gal dávjá ahte lávddis beassá gullat Kiyari.

 

Sympiosa luođi birra

Áigumuš dáinna prošeavttain lea ovdanbuktit sámi kultuvrra japánalaš gehččiide, earenoamážit nuorra gehččiide ja guldaleddjiide. Kon­seartta oktavuođas lágiduvvo maid symposiuma sámi kultuvrra ja juoigama/luođi birra.

Bagadalli lea Haukur J. Gunnarsson ja buvttadeaddjit leaba Nobuhiko Morioka ja Toshiyuki Nator.  Gunnarsson ja Teáhterhoavddat Rolf Degerlund ja Cecilia Persson ovddastit Sámi Našunálateáhtera Beaivváš ja Åarjelhsaemien Teatere álgo­čájálmasa oktavuođas Japánas.

Ovttasbargoguimmežagat leat Norgga ambassáda Tokyos, Sámi Našunálateáhter Beaivváš ja Åarjelhsaemien Teatere ja ruđalaččat leat dorjon Scandinavia Japan Sasakawa Foundation ja Nagano provinsa­ráđđehus.  

-Almmuhus-