Rámiduvvo go áŋgirit lea lágidan mánáide čuoigamiid, ráhkadan čuoiganláhtuid ja dikšon vázzinbálgáid sirbmálaččaide.
Tor Asle Varsi oaččui Finnmárkku fylkkagieldda álbmotdearvvašvuođabálkkašumi 2018.
Varsi lea Sirpmá valáštallansearvvi čuoiganjoavkku jođiheaddji.
– Olu jagiid lea son áimmahuššan vázzinbálgáid ja čuoiganláhtuid vai olbmot Sirpmás besset dain lášmmohallat. Lassin áddjás láhttobargguide, lea son áŋgirit ásahan ja jođihan mánáide ja nuoraide čuoiganhárjehallamiid. Varsi maid veahkehallá gili olbmuid go láve gilisearvvi bassinbarttas dolastallat, Suttesájajávrregáttis, vai čuigiide lea liegga barta go bohtet dohko. Ja go čuoiganláhtut leat gárvásat, de son dieđiha dan birra Sirpmá valáštallanjoavkku facebooksiiddus.
Nu čállet Finnmárkku fylkkagieldda neahttasiiddus.
Bálkkašupmi lea 30.000 ruvnno ja juhkkojuvvo maid fylkkavisttis gaskavahku golggotmánu 17.beaivvi.
Ledje boahtán oktiibuot guhtta árvalusa dán bálkkašupmái.
