Oahpahallet fas juoigat

Dušše moadde vahkku maŋŋel go Ella Marie Hætta Isaksen vuittii Stjernekamp gilvvu luđiin, gullo­goahtá fas luohti NRK 1:š tv-kanálas. 

Skábmamánu 10. beaivvi lea oainnat «Muitte mu» nuppi oasis premieara. 

– Luohti lea ožžon olu fuomá­šumi tv-gehččiin maŋŋel go šattai sierra musihkkašládjan Stjerne­kamp gilvvus. Sii geat leat návddašan luođi dan olis, besset dál vásihit luođi eará láhkai «Muitte mu» prográmmas, lohká NRK Sámi prošeaktajođi­headdji Wenche Marie Hætta preassadieđáhusas. 

Ođđa bálgáráigge

Guhtta norgalaš artistta galget «Muitte mu» prográmmas golmma beaivvis oahppat juoigat ja dasa lassin bidjat luođi soapmásii geas lea stuora mearkkašupmi sin eallimii. Juohke oasseváldis lea juoigi rávve­jeaddjin.

Juoiganteknihkka ja jietna­geavaheapmi hástala oasseváldiid, muhto sii galget maid fysalaš doaimmaid bokte guorrat bálgá luohtemáilbmái. 

– Lea hui gelddolaš oaidnit man láhkai profeššunealla Norgga artisttat, geat eai dieđe olu luođi birra oahpahallet juoigama bokte čilget dovdduid ja historjjáid, lohká Hætta.   

Oasseváldit/luođit/mentor: 

• Alexander Rybak: Son dovddai iežas olgguštuvvon go fárrejedje Norgii ja danin háliidan juoigat luođi sidjiide geat dovdet iežaset olggobealde. Luohtementor: Frode Fjellheim. 

• Adrian Angelico: Juoigá uhca oappás Pernille guhte leamaš nanus vaikke lea buohcan psyhkalaččat ja ožžon boasttu diagnosa.

Luohtementor: Marit Hætta Øverli.  

• Miia (Mia Brubakken): Juoigá iežas etno Joachima, čájehan dihtii makkár mearkkašupmi sus leamaš Miia musihkkabargui.

Luohtementor: Johan Anders Bær.

• Christian Ingebrigtsen: Gudnejahttá iežas áhči ja ovdagova. Son dáhttu luđiin giitit doarjaga ovddas maid lea ožžon mánnávuođa rájes.

Luohtementor: Simon Issát Marainen.

• Miss Tati: Juoigá Irem gii movttiidahtii su bargagoahtit musihkain. Luohtementor: Mikkel Gaup.

• Ida Maria: Juoigá iežas turnéjođiheaddji Becky gii lei stuora doarjjan artistii go beasai eret alkoholismmas.

Luohtementor: Niko Valkeapää.