-Almmuhus-
OĐĐASATVáruhit geavaheames lobihis girdi čakčabivddu oktavuođas 

Váruhit geavaheames lobihis girdi čakčabivddu oktavuođas 

-

-

Čakčabivdu álgá fargga ja leat iešguđet vuogit mo beassá bivduguvlui. Dál váruha Áibmo­johto­lat­bearráigeahčču olbmuid geavaheames smávva­girdi dahje helikoptera, mas lea pilohta dahje fitnodat mii ii leat dohkkehuvvon fievrredit olbmuid ja rusttegiid. 

Árabut dán jagi dubmejuvvui Finnmárkku almmái 15 beaivvi giddagassii go lea lobiheamet girdán.

Sivvan dasa lei go almmái válddii mávssu fievrredit olbmuid ja rusttegiid smávvagirdiin, ja albmá fitnodat šattai máksit 200 000 ruvnno go lei lobiheamet girdán. 

– Dat ášši lea čielga ovda­mearkka ahte lea rihkkon  áibmojohtolatlága, duođalašvuohta lea nu roavis ahte váidojuvvui politiijai. Áibmojohtolat­bearrái­geahč­ču lea dan dihte hui duđavaš duomuin. Ášši buvttiha presedeanssa dakkár lobihis girdi­miidda, ja lea váruhus earáide geat árvvoštallet fievrredit olbmuid ja rusttegiid, geain eai leat báhpárat ortnegis, dadjá Áibmojohtolat­bearráigeahču juridihkalaš direktevra Nina B. Vindvik preassa­dieđáhusas.

 

Sáhka girdisihkaruvođas

2016:s oaččui Áibmojohtolat­bearráigeahčču maŋŋá dieđu gos váruhuvvo lobihis girdin Finnmárkkuduoddaris.

Daid dieđuid vuođul čađahii Áibmojohtolatbearráigeahčču bearráigeahčču ovttas báikkálaš politiijain ja oanehis áiggi maŋŋá fas ovtta dieđi­keahtes bearráigeahču.

Bearráigeahču boađus lei ahte okta olmmoš váidojuvvui, ja Finnmárkku politiijat áššáiduhtte su ja duopmu celkui cuoŋománus dán jagi.

– Dás lea sáhka girdi­sihkar­vuođas, ja dan dihte váldit mii duođalaččat dakkár dáhpáhusaid. Dán áššis ii lean fitnodagas dárbbašlaš lohpi fievrredit olbmuid ja rusttegiid, dadjá Nina B. Vindvik.

 

Heakka ja dearvvašvuođa várra

Leat garrasit gáibádusat fitnodagaide ja servviide mat fievrredit olbmuid go sidjiide geain leat girdin valáštallama dahje astoáigge várás.

Áibmojohtolat­bearrái­geahčču lea dan dihte hui duđavaš duomuin.

– Lea dehálaš eiseválddiide ahte garrasit reagerejuvvo girdimiidda main sáhttá heakka ja dearvvaš­vuođa várra. Dás lea sáhka earret eará suddjemis sin geat ostet girdibálvalusaid, go sii hárve dihtet makkár riskka sii váldet. Lassin dasa lea vel dehálaš suddjet lobálaš ja profeššunealla ealáhusaid doaimmaid sin vuostá geat lobiheamet doibmet, lohká Vindvik. 

 

Bivde oaidnit báhpáriid

Áibmojohtolatbearráigeahčču ávžžuha buot bivdiid, geat áigot láigohit girdi dahje helikoptera, oaidnit pilohta dokumentašuvnna mii addá dárbbašlaš lobi. 

Dat guoská sihke vuodjinlohpái ja kommersiealla fievrrideapmái. 

-Almmuhus-