Ávvir lea logi jagi dán jagi – ja min mielas ánssáša aviisa luođi de. Danne bovdet mii luohtebiddjiid searvat gilvui ráhkadit luođi Ávvirii!
– Luohti galggašii govvidit aviissa ja dan doaimma mii mis lea sámi servodagas, lohká váldodoaimmaheaddji Kari Lisbeth Hermansen.
Geavahit márkanfievrrideami oktavuođas
Váldodoaimmaheaddji čilge ahte luođi áigot geavahit aviissa doaluin, márkanfievrrideami oktavuođas ja eará oktavuođain mat lunddolaččat gusket aviissa doibmii.
– Mii eat leat bidjan meriid makkár luđiin dahje dovnnain searvá, sáhttá leat árbevirolaš luohti dahje musihkkaluohti. Dan mearrida luohtedahkki ieš, lohká Hermansen vel.
Buorre vuoitu
Ávvira neahttadoaimmaheaddji, Berit Marie Lise Eira, illuda gullat vuoitoluođi ja sávvá oallugiid searvat.
– Jáhkán ahte šaddá miellagiddevaš gilvu. Lea buorre vuoitu nu ahte sávan oallugat servet. Šaddá somá gullat mo luohtedahkkit govahallet Ávvira, dadjá son.
Luohti mas veahá deaddu
Luohtedovdi Biret Risten Sara lohká luođi sáhttit vaikko makkárin.
– Geahppa, duođaleabbo, losit, movttegeabbo dahje vaikko guđelágan. Ferte de smiehtastit mii dat Ávvir lea. Ferte maid smiehttat dan vuođu go dan luođi bidjá ja masa son bidjá.
Nu mo mii dovdat luđiid de dat galget govvidit ovdamearkka dihte olbmo dahje ealli. Dán oktavuođas galgá govvidit dan ásahusa mii dat lea.
Dán jurddaša Biret Risten Sara Ávvira luođi birra:
– Mun jáhkán Ávvirii galggašii dakkár luohti mas lea veahá deaddu. Várra galggašii dakkár mii manná veahá dássedit ja čájeha dan duođalašvuođa, go Ávvir han muitala olu dehálaš áššiid servodagas. Medias lea fápmu ja vejolašvuohta, nu ahte galggašii givrodat dan luohtái, jurddašan mun.
Guokte vahkku áigemearrái
Vuoitoluohti almmuhuvvo Ávvira 10-jagi ávvukonsearttas Guovdageainnus, borgemánu 24. beaivvi.
Gilvui lea ain vejolaš searvat go áigemearri sáddet luođi lea borgemánu 16. beaivvi diibmu njealjis.
Vuoitu lea 10 000 ruvnno vuoitoluohtái.
Luođi sáddet ná:
Sáhtát báddet mátketelefovdnii, dahje studios. Jus ii leat gelbbolašvuohta dan dahkat de váldde Ávviriin oktavuođa.
Luođi sáddet epoasttain dahje sms nilsjohan@avvir.no, mobiltelefuvdna +47 46633770