Guhtta luođi leat searvan Ávvira luohtegilvui, ja dás sáhtát gullat daid luđiid.
OĐASTUVVON 23.08.18 diibmu 00.01: Mii leat dál gidden jienasteami.
Ávvir lea logi jagi dán jagi – ja min mielas ánssáša aviisa luođi de. Danne leat mii bovden luohtebiddjiid searvat gilvui ráhkadit luođi Ávvirii!
Dá leat dat guhtta luođi mat serve gilvui, ja dál sáhtát don jienastit ja váikkuhit guhte du mielas galggašii vuoitit gilvvu.
Guokte jurylahttu addet čuoggáid luđiide, ja goalmmát jurylahttu lea álbmotjury, dahje don. Dat gii eanemus čuoggáid oažžu dan guovtti jurylahtus ja álbmotjurys, vuoitá 10 000 ruvnno ja Ávviris lea de maid luohti.
Don sáhtát dušše oktii jienastit guđe don oaivvildat ánssáša vuoitit gilvvu. Lea beare sáddet SMS nummárii mii lea vuolemusas siiddus, gosa čálát LUOHTI, bijat gaska, ja de čálát dan luođi nummára maid oaivvildat ánssáša vuoitit. De lea don mielde váikkuheame.
Jienasteapmi gidde gaskaváhku borgemánu 22. beaivvi diibmu 24.00.
Vuoiti almmuhuvvo Ávvira 10-jagi ávvudoaluin Guovdageainnus borgemánu 24. beaivvi Thon Hoteallas.
Ávvudoaluide besset nuvttá buot Ávvira abonneanttat, muđui earát sáhttet oastit bileahta.
Luođit leat biddjon maŋŋálaga seamma ládje go jienastan dieđuin leat vuolemusas siiddus.
Vuolemusas siiddus oainnát movt jienastat. SMS ii mávsse eambbo dan maid dábálaččat SMS máksá sáddet nuppi telefuvdnii.
Okta oasseváldiin, Jan Ole Hermansen, lea náitalan Ávvira váldodoaimmaheddjiin, Kari Lisbeth Hermanseniin. Ii váldodoaimmaheaddji eai ge Ávvira bargit leat mielde mearrideame gilvvu vuoiti. Buot luođit mat ledje sáddejuvvon áigemearrái leat mielde gilvvus. Vuoiti mearridit ollásit fágajurylahtut ja álbmotjienat. Fágajurylahtuid namat almmuhuvvojit go vuoitoluohti almmuhuvvo.
Berit Marie Lise Eira Neahttadoaimmaheaddji/sadjásaš doaimmaheaddji
