Dán jagáš Márkomeannu rahppo áidnalunddot teáhterčájáhusain, «Sáŋgárat máhccet», duorastaga 18.00. Dán dieđiha Márkomeannu preassadieđáhusas. Olles festivála galgá govahallat fiktiiva duohtavuođa, ja golbma sámi deháleamos ofelačča ilbmet boahtteáigái láidestit festiválagussiid Márkomeanu čađa.
Dán jagáš Márkomeannu rahppo áidnalunddot teáhterčájáhusain, «Sáŋgárat máhccet», duorastaga 18.00. Dán dieđiha Márkomeannu preassadieđáhusas. Olles festivála galgá govahallat fiktiiva duohtavuođa, ja golbma sámi deháleamos ofelačča ilbmet boahtteáigái láidestit festiválagussiid Márkomeanu čađa.
– Mii leat bidjan olu návccaid dán jagáš konseaptajurdagii, ja teáhterčájálmas mii bistá olles festiválavahkkoloahpa lea ieš dat caggi konseapttas.
Festiválas beasat oaidnit Elsa Laula Renberga, Anders Larsena ja Jaakko Sverloffa.
Sii boktet ođđa ja ovddeš jurdagiid mis, ja ofelastet min ráfálaš servodahkii.
– Mun lean sihkar ahte buohkat oahpásnuvvet dáiguin golbmasiiguin festiválaáiggis, muitala festiválajođiheaddji Anne Henriette Reinås Nilut.
Ante Siri, Nina Välkeapää ja Aleksi Ahlakorpi galget neaktit iešguđet sáŋgárrolla.
– Vuosttaš maid guossit deivet dán jagi, lea uvssot mii doalvu sin jahkái 2118 ja festiválabáikái.
Uvssot ovddasta lávkki oadjebas birrasii fiktiiva postapokalyptiska máilmmis.
– Jođus váldolávdái besset deaivvadit nuoraiguin geain leat nanu cealkámušat. Nuorat leat oassin prošeavttas Márkolávdi (ovttasbargu HATS:in), gos golmma bargobajis, ovttas Mikkel Gaupain ja Nina Erdahlain, leat bidjan oktii lávdedáidagiid iešguđetge hámiin.
Mii lohpidit áidnalunddot hávskes vásáhusa rahpamis. Šaddá erenoamáš čájáhus man beasat dušše okte vásihit, loahpaha festiválajođiheaddji Anne Henriette Reinås Nilut ja sávvá buohkaide bures boahtima Márkomeannu 2118:i.
Sunna Kitti, Suoma beale Sámis eret, doallá dán jagáš váldočájáhusa mas čájeha oasážiid jagiin gaskal 2018 ja 2118.
Das čájeha maid makkar máilbmi lea oaidnit dan áiggis go Márkomeannu lea dál.
Su hámit leat inspirerejuvvon Japána «manga-stiillas» ja «science fiction».
Kittis leat 10 dáidaga mielde, ja dat čájehuvvojit iešguđetge hámis festiválabáikkis.
