Eanet go 34 500 oahppi leat ožžon fidnofágalaš oahpposaji joatkkaskuvllain Norggas. Bealli sis geat álget vuosttas jahkái lean ožžon saji fidnofága oahppoprográmmaide, ja dát lohkku ii leat leamaš ná stuoris máŋgga jahkái.
– Lea illudahtti go nu ollugat válljejit fitnofága. Mii dárbbašit čeahpes fágabargiid boahttevaš jagiin, dadjá oahppo- ja integrerenministtar Jan Tore Sanner.
Joatkkaskuvllaid sisaváldinlogut čájehit ohcciid lassánan dearvvašvuođa- ja bajásšaddansuorggis, 437 eanet oahppi go diibmá leat ožžon oahpposaji dán suorgái . Huksen- ja rusttetteknihkka suorggis ges leat 246 eanet oahppi ožžon oahpposaji dán čavčča go maid diibmá dahke.
Oahpporáhkkanahttinsuorggis lea stuorimus njiedjan ohcciidlogu mielde, ja dán jagi álget 2409 unnánat oahppi diimmá čavčča ektui.
