Ii goasse ge ovdal leat vuvdon nu ollu veteránabiillat Norggas. Dál eai leat dušše riggát ja sii geat liikojit divodit biillaid geat háhket alcceseaset boares biillaid.
Ii goasse ge ovdal leat vuvdon nu ollu veteránabiillat Norggas. Dál eai leat dušše riggát ja sii geat liikojit divodit biillaid geat háhket alcceseaset boares biillaid.
– Beroštupmi boares biillaide lassána Norggas, maiddái dábálaš olbmuid gaskkas, dadjá Gonagaslaš Norgga Automobiillasearvvi generálačálli Børre Skiaker Newswire ođasdoaimmahussii.
Beroštupmi lassánan
Maŋemuš logi jagis lea lassánan gávppašeapmi biillaiguin mat leat boarráseappot go 30 jagi.
Diibmá gávpaledje Norggas 13475 veteránabiilla. Buohtastahttin dihte de vuvdoje 2005 jagis 9317 veteránabiilla.
Norggas leat ge dál sullii 200 000 registrerejuvvon veteránafievrru. Dasa lassin leat vel olu mat eai leat registrerejuvvon.
– Beroštupmi boares biillaide lea lassánan hirbmadit. Olu modeallat leat maiddái divron. Dábálaš olbmot leat maiddái beroštišgoahtán boares biillain. Illu vuoddjit ja eaiggádit lea oassi manne olusat leat beroštišgoahtán boares biillaide, dadjá Skiaker.
Olusat jerret
Norgga geaidnomuseas, Lillehammeris, maiddái vihkot ahte beroštupmi historjjálaš fievrruide lea lassánan.
– Eambbosat geat fitnet min guossis museas jearahit maiddái boares veteránafievrruid. Dat čájeha ahte beroštupmi boares fievrruide lassána, dadjá Norgga geaidnomusea direktevra Geir Atle Stormbringer.
Rahppo musea
Boahtte jagi rahppo ge Norgga historjálašfievrruid musea seamma báikái go geaidnomusea.
– Dál ii gávdno ge nationála ásahus mii áimmahušša kulturárbbi mii guoská fievrruide. Dál lea maid departemeanta ja ráđđehus fuomášan dan ja juolludit doarjaga fievromuseai, dadjá Stormbringer.
Unnán doarjja
Dál doarju stáhta ruđalaččat hui unnán sin geat dollet ortnegis boares fievrruid.
– Boaresbiillaid berošteaddjit barget dehálaš barggu servodahkii go ieža mákset ja divodit boares fievrruid main lea kulturhistorjjálaš árvu. Danne berrešii sii maiddái oažžut doarjagiid dan barggu ovddas, dadjá Børre Skiaker.
Čállán: Rolf Magnus W. Sæther/Newswire ođasdoaimmahus