Vuollavuoššanfitnodagat vásihit ahte alkoholakeahtes vuolla lea šaddan eambbo bivnnut. Ággan dasa sáhttá leat ahte eambbo dievdoolbmot leat beroštišgoahtán dearvvasvuođas.
2017:s einnostii beakkán goahkka ja Eurohpá Bocouse d´Or-vuoiti, Christian André Pettersen, ahte alkoholakeahtes vuola šaddá eambbo bivnnut go goassege ovdal 2018:s.
Geassemánus lassánii vuovdin 27 proseanttain, dieđiha Bryggeri- og drikkevareforeningen mii lea vuollavuoššan- ja jugusgálvosearvi.
Bryggeri- og drikkevareforeningen direktevra, Petter Nome, oaivvilda ahte vuollavuoššanfitnodagat
bidjet eambbo návccaid dása ja ahte johttu alkoholakeahtes vuollagis ovdána ain ovddosguvlui.
Miessemánus ja geassemánus ollu lassánan
Ringnes gulahallanhoavda, Nicolay Bruusgaard oaivvilda ahte alkoholakeahtes vuolla lea šaddan duohta ja lea buorre molssaeaktu borramušain fárrolaga ja maid stuoribuš deaivvademiin.
– Mii bargat dan guvlui ahte sii geat háliidit juhkat alkoholakeahtes vuollaga maid ožžot buriid fálaldagaid. Ovdal eai leat nu ollu olbmot beroštan alkoholakeahtes vuollagis, muhto mii vuohttit dál ahte beroštupmi lea lassánan ja mii vuordit ain lassánit ovddasguvlui. Danne mii leat ge dál bargamen ráhkadit ođđa smáhkaid ja variánttaid, muitala Bruusgaard Godt.no neahttasiidui.
