Ijahis Ija 15. festiválii lea prográmma gárvvis

Festivála deavdá dál 15 jagi, ja lea lágiduvvon juohke borgemánu Anáris dan rájes go álggahuvvui. Dál leat almmuhan festivála prográmma. 

– Prográmma lea viiddis ja máŋggabealat, čállet lágideaddjit preassadieđáhusas.

Mánáide fáladat

Festivála álgá borgemánu 17. beaivvi, ja álggahuvvo mánáid- ja nuoraidprográmmain. Iešguđetlágan bargobájit lágiduvvojit, ja sámi filmmat čájehuvvojit.

Mánát besset čájehit iežaset dáidduid «Ijahis ija násttážat» -konsearttas.

Indigenous Bastards rahpá ovttas Palttoin

Almmolaš rahpandoalut leat diibmu 18 bearjadaga. Dalle juoiggasta Nils-Heikki Paltto, ja dan maŋŋel čuojahit Indigenous Bastards joavku. 

Rahpandoaluid maŋŋil lea njoarostansprintta.

Bearjadaga konsearttat Ijahis ija váldolávddis fállet sihkkarit juohkehažžii juoidá, go lávddi ala gorgŋejit Solju-joavku, Norgga beale sámi pop-násti Kevin Boine ja kanadalaš DJ-kollektiiva A Tribe Called Red.

Ávvudit

15 jagi ávvudeapmi ii leat áidna ávvudeapmi dán jagi. Doaluid váldolágideaddji Anára Sámisearvi fas ávvuda 35 jagi doaluidis váldolávddis.

Lávvardat álgá musihkkaseminárain, mii lágiduvvo sámemuséas, Siiddas. Ávvujagi semináras fáddán lea Ijahis idja. Aslak Paltto jođihan panelaságastallamis vihkkedallet Ijahis Ija historjjá ja mearkkašumi dálá sámemusihkkii ja musihkkariidda.

Eahketbeaivi joatkašuvvá Sajosa auditorias konsearttain «Luohti ja Suõmmkar». Konsearttas juiget Berit Alette Mienna, Ingá Elisá Påve Idivuoma, Hildá Länsman ja Iŋgá-Máret Gaup-Juuso. Nuortalašgielat Suõmmkar-joavku fas almmustahttá vuosttaš skearru.

– Auditoriokonserttat leat šaddan bivnnuhabbon juohke jagi ja dat čohkkejit olbmuid návddašit sámemusihkas intiima birrasis, čállet lágideaddjit preassadieđáhusas.

Vildá, Felgen, Amoc ja Tundra Electro 

Lávvardaga váldolávddis gullat vuosttažin Hildá Länsman ja Viivi Saarenkylä Vildá-joavkku. Váldolávddis loaiddastit sudno lassin Felgen Orkester, Amoc & Ailu ja Trio Boogiemen, Tundra Electro ja árbevirolaš juoigit.