-Almmuhus-
OĐĐASATSámediggi doarju sámi giellaguovddáža ásaheami Kárášjohkii 

Sámediggi doarju sámi giellaguovddáža ásaheami Kárášjohkii 

-

-

Sámediggi juolluda dál badjel miljovnna ruvnnu iešguđetlágán Kárášjoga  gielladoaimmaide. – Daid doarjagiid bokte mii láhčit dili nu ahte Kárášjoga gielda earret eará beassá ásahit giellaguovddáža, lohká sámediggepresideanta Aili Keskitalo.

Sámediggi lea dán jagi juolludan 250 000 ruvnnu Kárášjoga giellaguovddášálggaheapmái prošeavtta «Giella ja identitehta» bokte.

Sámediggi juolluda sámi giellaguovddážiidda álggahan­doarjagiid golmma jagi badjel, dieđiha Sámediggi preassadieđa­husa bokte.

 

Giella ja identitehta

Ulbmil «Giella ja identitehta» prošeavttain lea movttiidahttit mánáid, nuoraid ja sin váhnemiid sámegiela atnit, oahppat ja dikšut.

Jurdda prošeavttain lea lágidit «Kick off» eahkediid gos logaldallit ja giellaberošteaddjit čuvgejit dili.

Deaivvademiin galget hutkat ja rávvet man láhkai ovdánahttit giela.

Dát prošeakta lea maid vuođđun ásahit sierra giella­guovddáža Kárášjohkii.

– Giella lea dehálaš kultuvrii ja identitehtii. Sámi giellaguovddážat leat nu mávssolaš ovttasbargo­guoimmit sámegielaid ovdánahtti­mis ja seailluheamis. Dasa lassin lea buorre go Sis-Finnmárkku gielddat vuoruhit giella­doaim­maid. Mii maid fertet dáppe ovddidit giela, vaikko sámegiella lea eanetlogugiella, dadjá sáme­diggepresideantta Aili Keskitalo preassadieđáhusas.

 

Sámediggi doarju maid dáid giellaprošeavttaid Kárášjoga gielddas giellaguovddáža ásaheami oktavuođas:

  • Báikenamat ja kulturmuittut: 237 000 ruvnnu. Ulbmil prošeavttain lea boktit mánáid ja nuoraid beroštumi ruovttugieldda báike­namaide ja kulturmuittuide ja dan bokte oahppat olbmuid ja sogaid gullevašvuođa dihto báikkiide.
  • Nuoraidlávdi: 234 000 ruvnnu. Nuorat galget sámegielain čilget ja govvidit nuoraid dili ja sin jurdagiid sohkabealrollaid, seksualitehta, givssideami ja veahkaválddi hárrái. Sii galget ráhkadit lávdečájálmasa mas lea rollaneaktin sámegillii oktan luohte- ja musihkkačehpiiguin ja eará lávdedáiddáriiguin.
  • Hállanhállu: 237 000 ruvnnu. Ulbmil prošeavttain lea nanusmahttit sámegielbirrasa sidjiide geat leat oahpahallame sámegiela, dahje háliidit dikšut sámegielaset. Iešguđetlágan deaivvademiin, fáddáeahkediin, mátkkiin, ja buđaldemiin ja bargguin besset oasseváldit sámástit.
  • Čállinverdde: 203 000 ruvnnu. Vuorrasiid gaskkas vásihuvvo dávjá ahte oktagaslaš vuoigat­vuohta oažžut sámegillii ja kultuvrii heivehuvvon bálvalusaid ii váldo vuhtii. Prošeavtta ulbmil lea veahkehit vuorasolbmuid lohkat ja čállit, ja veahkehit bálvalusaiguin mat leat digitaliserejuvvon.
-Almmuhus-