Odne beaivet gávdnui nissonolmmoš jápmán Guovdageainnus. Finnmárkku politiijat leat dutkagoahtán jápmima.
Finnmárkku politiguovllu operašuvdnajođiheaddji, Jan–Olav Schjølberg, muitala iežaset ožžon odne, lávvordaga, dieđu sullii diibmu 14:00, ahte nissonolmmoš lea gávdnon jápmán iežas ruovttus Guovdageainnus.
– Badjelaš 30-jahkásaš nissonolmmoš lea gávdnon iežas ruovttus jápmán čohkkut stullui. Lei ránnjá gii dieđihii veahkkeguovddážii dan birra. Mu dieđu mielde galgá ránnjá fuomášan dan láseráigge, ahte nissonolmmoš lea čohkkut stuolus, ja dasto lea dieđihan, muitala Schjølberg.
Geahččaledje heakka jiellut
Finnmárkku politiguovllu operašuvdnajođiheaddji, Jan–Olav Schjølberg, lohká ahte Seaking gádjunhelikopter gohččojuvvui seaivut Guovdageidnui, go geahččaledje jiellut heakka nissonolbmui.
– Dađi bahábut ii lean heagga šat gádjumis, dadjá Schjølberg.
Eai várot rihkkusáššin
Schjølberg lohká ahte politiijat leat leamaš báikkis geahččame, ja leat maid vihtaniid jearahallan. Son ii loga politiijaid várohit geavvan rihkusášši.
– Muhto go lea dan mađe nuorra olmmoš jápmán masa eat dieđe siva, de háliidat dan diehtit. Danne leat dábálaš dábiid mielde álggahan dutkama. Dat lea dábálaš go eat dieđe siva manne olmmoš lea jápmán, muitala Jan–Olav Schjølberg.
Loahpas lohká Finnmárkku politiguovllu operašuvdnajođiheaddji, Jan–Olav Schjølberg, ahte nissona rumaš sáddejuvvo rumašiskkadeapmái Romsii.
