FeFo lea virgádan Robert Greinera ođđa gulahallan- ja servodatoktavuohtajođiheaddjin. Greiner lea movttat go lea ožžon luohttevašvuođa FeFos. Dál son illuda álgit bargat virggis.
FeFo lea virgádan Robert Greinera ođđa gulahallan- ja servodatoktavuohtajođiheaddjin. Greiner lea movttat go lea ožžon luohttevašvuođa FeFos. Dál son illuda álgit bargat virggis.
Robert Greiner lea eret Beavgohpis Porsáŋggus ja dál son lea virgáduvvon FeFo gulahallan- ja servvodatoktavuođajođiheaddjin FeFo váldokantuvrii mii lea Leavnnjas, Porsáŋggu gielddas, Finnmárkkus.
– Greiner lea duođaštan ahte son máhttá media, Finnmárkku, sámi gažaldagaid ja politihkalaš proseassaid. Mii leat hui ilolaččat go leat ožžon su mielde min searvái, dadjá FeFo direktevra Jan Olli preassadieđáhusas.
Illuda veahkehit
Dál lea Robert Greiner politihkalaš ráđđeaddi Romssa sátnejođiheaddjái Kristin Røymoi ja oasseáiggečadnon Bargiidbellodaga sámediggejoavkkus.
Son lea ovdal leamaš politihkalaš ráđđeaddi stuorradiggeáirasii ja Romssa ovdalaš fylkkaráđđejođiheaddjái, Cecilie Myrsethii.
Greiner lea máŋga jagi bargan NRK Romssa ja Finnmárkku journalistan. Son lei maiddái OL-fitnodaga Romssa 2018 bargi.
– Illudan veahkehit Finnmárkku eatnamiid hálddašeamis ja ovddideamis, mii lea buoremus searvevuhtii, dadjá Robert Greiner.
– Mu ruovttufylkkas
Ávvir jearrá manne son ozai FeFo gulahallan- ja servvodatoktavuođajođiheaddjin virgái.
– Sis lea álbmotbálvaleaddji doaibma mainna mun álohii lean bargan, go lean leamaš NRK:s dahje politihkas. Nubbi ágga manne ohcen lea ahte dat lea fágalaš hástaleaddji ja goalmmádin go dát bargu lea mu ruovttufylkkas, dadjá Robert Greiner.
Virgádeami oktavuođas luohpá son buot politihkalaš ámmáhiin ja álgá čakčat virgái.
Robert Greiner váldá badjelasas Eirik Palm virggi, gii álgá Finnmárkkuebuohcciviesu gulahallanjođiheaddjin.