Dievdu váldojuvvon gitta Vuotnasiida-goddima oktavuođas mii dáhpáhuvai 1998:s.
Politiijat leat váldán gitta dievddu, guhte lea áššáiduvvan goddán nissona Vuotnasiiddas suoidnemánu 1998:s.
– Lea leamaš ođđa geahčadeapmi áššeduođaštusain, ja čoakkáldatduođaštusa dihte politiijat oaivvildit ahte áššáiduhtton dievdu lea sivalaš goddimiidda, dieđihit Romssa politiijat preassadieđáhusas bearjadaga.
Veagalváldon ja goddon
Marie-Louise Bendiktsen gávdnui veagalváldojuvvon ja gottáhallan iežas ruovttus mii lei boldojuvvon, Vuotnasiiddas Siellakvuona suohkanis Romssas, suoidnemánu 15. beaivvi 1998.
Ovdalaš dutkamat leat almmustahttán ahte viessu cahkkehuvvui moadde beaivve goddima maŋŋel.
Dalle go goddin dáhpáhuvai, orro Vuotnasiiddas 2300 olbmo. Ledje ollu olggobeal olbmot boahtán geasseluomu dihte, go luossabivdu álggii, ja go lei vel jahkásaš kulturvahkku.
Dasa lassin lea gielddas leamaš stáhtalaš dorvoohcciid vuostáiváldinbáiki mas leat leamaš 100 saji 1989 rájes.
Gažadan 1400 olbmo
Politiijat leat gažadan oktiibuot measta 1400 olbmo dán ášši oktavuođas, ja sii leat fitnan eanet go 3000 olbmo luhtte.
Lea Iráka dievdu gii lea áššáiduvvan. Son gažaduvvui oanehis áiggi goddima maŋŋel, muhto go politiijat jagi maŋŋel áigo su oažžut ságaide, de lei son oalát jávkkodan.
Son lea Duiskkas orron guhkit áiggi ja maiddái čohkkán gávcci jagi doppe giddagasas go lei geahččalan goddit iežas moarsi Duiskkas.
Dál leat politiijat váldán su gitta, dieđiha NTB.
