Miessemánu 16. beaivi lea spábbačiekčama feastabeaivi.
Odne ii leat dušše Viddas el Classico, muhto vel njeallje eará njealját divišuvnna čiekčama.
Dehálaš namma guoddit
Árvonamma «Duoddara searat» lea dehálaš sihke Guovdageainnu ja Kárášjoga dievdduide, ja dáidet gealdagasas ovdal otná čiekčamiid.
Kárášjoga dievddut, Nordlys, leat juste dál jođus Guovdageidnui. Dán jagáš vuosttaš deaivvadeapmi ránnjásuohkaniid gaskka. Diibmá šattai boađus vuosttaš čiekčamis, mii lei Bákteváris, 1-1, ja Nordlys fas vuittii 2-0 go fas deaivvadedje Niitoguolbanis.
Dál dáidet veahá nearvvat goappašat joavkkuin, go ii goabbáge joavku háliidivčče vuoittáhallat dán čiekčama. Lea go son duottar ruoná, vai alit?
Čiekčan lea Bákteváris odne eahket.