Mannan ija leat leamaš moatti sajis rikkeremat Finnmárkkus ja moattis leat fas sáhkohallan, dán dieđihit Finnmárkku politiijat Twitteris.
Mannan ija leat leamaš moatti sajis rikkeremat Finnmárkkus ja moattis leat fas sáhkohallan, dán dieđihit Finnmárkku politiijat Twitteris.
Álttás bissehedje politiijat muhtin albmá 20-jagiin. Almmái várohuvvui vuodjimin juhkanvuođas ja dolvojuvvui doaktára lusa varraiskosiidda. Politiijat ceggejit ášši dás.
Bálkestuvvui olggos
Mehámmanis bálkestuvvui muhtin guossi olggos muhtin olgobáikkis go časkkii uksavávtta ámadadjui. Guossi váidojuvvo vuossárgga politiijaide vearredaguid ovddas.
Hámmárfeasttas gohččo politiijat muhtin albmá 20 jagiin guođđit gávpotguovddáža, go almmái lei juhkan ja rikkerii.
Doarrumat
Guovdageainnus šadde politiijat mannat muhtin vissui gos dieđihuvvui rikkeara. Viesus ledje muhtimat doarrán, ii oktage lean roasmmohuvvan doarrumiin. Politiijat ceggejit dás ášši.
Sáhkohallan
Kárášjogas lei geaidnopolitiijat leaktodárkkisteapmi, golmmas sáhkohalle alla leavttuin. Alimus leaktu lei 100 kilomehtera diibmui gos alimusleaktomearri lea 80 km diibmui.
