Mannan ija leat politiijat Finnmárkkus bissehan feastariejaid ja muhtimat leat vel gártan giddagassii, dán dieđihit Finnmárkku politiijat Twitteris.
Mannan ija leat politiijat Finnmárkkus bissehan feastariejaid ja muhtimat leat vel gártan giddagassii, dán dieđihit Finnmárkku politiijat Twitteris.
KIRKONJÁRGA:
Kirkonjárgga politiijat dieđihit ahte sii leat ovtta sullii mannan ija fitnan smávvafanashámmanis bisseheamen feasta. Muhtin feastaoasseváldit dolvojuvvo ruoktot ja muhtimat manne ieža vácci. Feasttas ledje ollu nuorat.
Ráfehisvuohta
Guovtti sullii ihkku šadde fas politiijat mannat gávpotguovddážii gos dieđihuvvui ráfehisvuohta. Uksavávttat ja guossit eai lean ovttaoaivilis ja danin šadde gazzalágaid.
Politiijat fertejedje čoavdit riiddu ja dáhtto gussiid guođđit báikki.
Giddagassii
Girkonjárggas maid šattai muhtin juhkanalmmái mannan ija giddagassii, sullii diibmu beal njealjis. Sivva dasa lea go ii lean dohkkehan politiija gohččuma ovdalaččas eahkedis.
Politiijat ceggejit dás ášši ja almmái ii luito giddagasas ovdal go čielgá.
HÁMMÁRFEASTA:
Hámmárfeasttas dieđihuvvui ikte eahkedis politiijaide ahte muhtin vuorasčuoigi ii lean boahtán ruoktot čuoiganmátkkážis. Skohtervuoddjit vuoddjájedje ohcat su. Beal logis eahkedis dieđihuvvui ahte son lei gávdnon.
Čuoigi lei gahččan, ii ge nagodan ieš beassat fas čuoččat. Čuoigi lei maid čoskkiidan go gávdne su.
Jiena vuolidit
Beal ovttas ihkku šadde politiijat dáhttut muhtin feastaoasseváldiid vuolidit jiena muhtin dálus Lávžželuovttas Hámmárfeasttas.
Dađe maŋŋelaš, guovtti sullii, dolvo fas politiijat muhtin albmá ruoktot, gii lei badjelmeare juhkan. Su ruovttubáiki lea maid Lávželuovttas.
ÁLTÁ:
Beal ovttas ihkku dieđihuvvui politiijaide Álttás ahte muhtin almmái 20 jagiin lei dearpalan eará albmá gávpotguovddážis. Almmái lea ovdalaččas dovddus politiijaide.
Son lei maid riŋgen politiijaide ja áitán sin. Almmái biddjui giddagassii ja politiijat čuovvolit ášši.
Juhkanvuođas vuodján
Vehá maŋŋelaš, ovtta sullii lei fas johtolat lihkohisvuohta Gakoris. Biilavuoddji, almmái 20 jagiin lei vuodján muhtin biilagoallosvovdnii.
Almmái várohuvvui juhkanvuođas vuodján ja dolvojuvvui doaktára lusa várraiskosiidda. Politiijat čuovvolit ášši.
Beal golmmas ihkku fas gohččojuvvui muhtin nisu guođđit olgobáikki, nisu láhttii váddásit ja ii ge dohkkehan politiijaid rávvagiid.
VÁRGGÁT:
Várggáin dieđihuvvui feastariedja muhtin doaluin. Politiijat fidne báikkis gohččumin jaskkodit.
Feasta lei dalle juo loahpahuvvomin.
