Ná lea Finnmárkku álbmotdearvvašvuohta

Dál lea fylkkagielda almmuhan raportta Finnmárkku álbmotdearvvašvuođa birra. Doppe lea earret eará álbmotovdáneami, bajásšaddama ja eallindábiid birra.

Finnmárkku fylkkagielda lea ovttas Norut AS:in ráhkadan dokumeantta mas muitalit Finnmárkku álbmotovdáneami, bajásšaddama ja fysalaš, biologalaš, kiemalaš, ja sosiálalaš birrasa birra.

Dan dieđiha Finnmárkku fylkkagielda preassadieđáhusas.

Unnán riegádeamit, sisafárren dagaha lassáneami

Go leat álbmotovdáneami analyseren, de leat gávnnahan ahte olu nuorat fárrejit fylkkas. Leat unnán šattolaš-ahkásaš nissonolbmot fylkkas, mii dagaha ahte leat unnit riegádeamit.

Vaikke lea nu, de lea Finnmárkkus muttát álbmotlassáneapmi, ja leat sisafárrejeaddjit mat dan dagahit.

Finnmárku dárbbaša boahtteáiggis maid sisafárremiid vai álbmotlohku ii njieja.

Geafivuođa ja sosiála erohusat

Go geafivuođas lea sáhka, ja sosiála erohusain, de čájeha raporta ahte Finnmárkkus eai leat liikká olu dállodoalut main lea unnán dienas, go buohtastahttá muđui riikkas. Dáppe leat unnit.

Finnmárkkus lea mánáidgeafivuohta gaskamearálaččat 1,5 proseantta vuollelis go muđui riikkas. Muhto leat muhtun suohkanat mat rahčet, go mánáidgeafivuohta lea arvat badjelis riikkagaskameari.

Oktavuođat buoridit healssu

Logut čájehit maid ahte finnmárkulaččain leat buorit oktavuođat, ja dovdet ahte muhtun sis berošta. Lagas oktavuođat bearrašiin, olbmáiguin ja earáiguin dagaha loaktima ja buori psyhkalaš dearvvašvuođa.

Seammás leat olu nuorat geat dovdet iežas leat akto. Iskkadeapmi čájeha ahte 23,5 proseantta nuorain Finnmárkkus dovde iežaset akto.

Muđui riikkas lea dat lohku 18,2 proseantta. 

Plánemii 

Buot fylkkagielddat fertejit hábmet dákkár dokumeanttaid iežaset fylkkain. 

Dán sisdoallu sáhttá miellagiddevaš oallugiidda. Gielddat ja fylkkagielddat sáhttet dán máhtu geavahit go plánejit ja muđui servodatovdáneamis. Sisdoallu sáhttá maid miellagiddevaš ealáhusaide, organisašuvnnaide, joavkkuide ja servviide. Dokumeantta gávnnat dáppe.

Vigdis Nygaard, Norut AS fitnodagas, ovdanbuvttii bohtosiid Finnmárkku fylkkagieldda kultuvra, álbmotdearvvašvuođa ja johtalus lávdegoddái njukčamánu 6. beaivvi.

Raporta maid ovdanbuktojuvvui Finnmárkku KS fylkkastivrii njukčamánu 8. beaivvi.