Politiijain lei oalle bargu gárrenolbmuid geažil mannan ija.
Váile ovttas sotnabeaivvi čuovganeapmái dieđihedje politiijat ahte ledje ožžon dieđu muhtin gárihuvvon albmá birra guhte lei E6 geainnu alde váccašeamen Bossegohpis Álttás.
– Son dagaha váralašvuođaid johtolahkii, mii doalvut su ruoktot vai ii vuojáhala, čállet politiijat Twitteris.
Ožžon boasttu dieđu
Dakka maŋŋil dieđihedje politiijat maid ahte leat ožžon dieđu muhtin feastta birra Álttás, gos galge leamen vuolleahkásaččat.
Sii fitne báikkis.
– Leat fitnan báikkis iskamin ášši, diehtu lea leamaš boastut, báikkis ii lean oktage vuolleahkásaš, čállet politiijat.
Mielahis vuodjin
Badjelaš bealguovttis ihkku, dieđihedje poliijat ahte ledje ožžon dieđu muhtin vilges Mercedes Benza birra mii galgá leat vuddjon mielaheamet.
Sii ohce biilla.
Geahččalii beassat olgobáikái
Guovtti áigge ihkku dieđihedje politiijat ahte muhtin nieida galgá leat geahččalan beassat olgobáikái Álttás, dakkár legitimašuvnnain mii ii gullan sutnje.
– Mii čuovvolat ášši, čállet politiijat.
Vižže nissona
Váile bealgolmmas dieđihedje ges ahte ledje šaddan váldit gitta muhtin nissona Girkonjárggas go lei badjelmeare gárihuvvan.
– Láhttii fasttit eará gussiid vuostá olgobáikkis ja politiijaid vuostá, dieđihit politiijat.
Leavnnjas riedja
Golmma áigge dieđihedje politiijat ahte sidjiide lei dieđihuvvon feastarieja birra Leavnnjas, muhto go jovde báikái, de doppe lei jo jaskkodan.
Dakka maŋŋil, diibmu 03.20, dattetge šadde Leavnnja politiijat finadit muhtin olgobáikki olggobealde.
– Guokte albmá leigga riejáskan ja suhtadan, mii finaimet báikkis ja sáddiimet goappašagaid ruoktot, čállet politiijat.
Dieid áiggiid dolvo politiijat muhtin gárrenalbmá Unjárggas maiddái ruoktot.
Válde varraiskosiid
Bealguđas dieđihedje politiijat vel ahte leat váldán muhtin albmá Hámmárfeasttas varraiskosiidda go almmái navdo vuodján gárrenoaivvis.
