Vuosttaš golmma mánus leat 16 olbmo duššan luottaid alde Norggas. Nu vuollegis lohku ii leat leamaš 70 jahkái, dieđiha Stáda geaidnodoaimmahat.
Vuosttaš golmma mánus leat 16 olbmo duššan luottaid alde Norggas. Nu vuollegis lohku ii leat leamaš 70 jahkái, dieđiha Stáda geaidnodoaimmahat.
2017 dušše 107 olbmo, ja dat lei erenoamáš vuollegis lohku. Dán jagi sáhttá lohku vel áin vuollegeappot.
Njukčamánu dušše guovttes, ja dat lea njealje unnit go diibmá seamma mánu.
– Ná vuollegis loguid eat leat oaidnán dan rájes go álggiimet albma statistihka fievrredit. Jáhkán ahte fertet unnimusat 70-80 jagi mannát maŋos vai gávdnat ná vuollegis jápmin-logu. Dál orru čielggas, Norgga luottat šaddet eambbo ja eambbo oadjebassan, lohká geaidodirektevra Terje Moe Gustavsen.
– 16 beare olu
2015, 2016 ja 2017 jagiid ledje Norggas unnimus duššamat olles Eurohpás go geahččá álbmotlogu ja kilomehteriid ektui.
– Leat ilus go logut njidjet. Muhto seammás leat 16 olbmo duššan, ja dat leat 16 beare olu. Dás ii leat dušše loguin ja statistihkain sáhka. Jus mii oažžut eambbosiid doallat leahttomeriid ja geavahit boahkána, de lea stuora vuoitu, lohká geaidodirektevra Terje Moe Gustavsen.
Son maid lohká ahte jus eambbosat vuojášii siivvu ja dálkki mielde, ja eai vuojášii gárrenvuođas, de livčče maid stuora vuoitun.
Eanemus duššamat dán jagi leat leamaš Møre ja Romsdalas, Tromssas, Akershusas ja Nuorta-Agderis. Doppe leat leamaš guokte juohke fylkkas. Dássážii ii leat okta ge duššan Buskerudas, Telemárkkus, Oarje-Agderis, Hordalánddas, Sogn ja Fjordanes ja Finnmárkkus.
12 dain 16 olbmuin geat dušše, ledje dievddut.
(©NTB)
