-Almmuhus-
OĐĐASATViimmat lohkkiidlogut plussa bealde

Viimmat lohkkiidlogut plussa bealde

-

-

Lohkkiidlogut čájehit ahte lea beroštupmi sámi aviissaide. Sihke Ságat aviissas ja Ávviris leat plussalogut.

Lohkkiidloguin, mat almmuhuvvojedje odne, boahtá ovdan ahte olbmot beroštit sámi ođđasiin. Sihke Ávviris ja Ságat aviissas leat plussalogut.

 

Plussalohku lea plussalohku

Ávviris leat guokte maŋemus jagi leamašan minuslogut, ja váldodoaimmaheaddji lea hui movttet go viimmat leat lihkostuvvan plussaloguiguin.

Obbalaččat golbma ođđa lohkki, ja oktiibuot 1 034 diŋgojeaddji geat lohket aviissa, sihke báber- ja digitálaaviissa.

– Vaikko ii leat stuora lohku, de lea plussalohku plussalohku. Norgga 226 aviissas lassánit 105 aviissas lohkkiidlogut ja mii leat daid gaskkas main lassána lohkkiidlohku. Dainna ferte leat duhtavaččat. Mis leat guokte maŋemus jagi leamašan minuslogut, ja leat diehttelasat hui movttegat go leat nagodan jorgalahttit lohkkiidlogu njiedjama, lohká Ávvira váldodoaimmaheaddji, Kari Lisbeth Hermansen.

 

Jáhkká Ávvir Plussa jorgalahttán loguid

Ávvir almmuhii mannan jagi gaskamuttus Ávvir Pluss, ja dan jáhkká ge váldodoaimmaheaddji veahkehan jorgalahttit loguid:

– Mii leat dan rájes go almmuheimmet Ávvir + geassemánu loahpas oaidnán dássedis lassáneami, eambbosat diŋgojit aviissa ja lohket min neahttaáššiid. Dál, go mis maid lea plussafálaldat, de eat dárbbaš nu go ovdal, doallat daid buriid áššiid dušše báberaviisii.  Neahttaáššiiguin olahit viidábut ja eambbosat fuomášit min áššiid ja leat mielas máksit vai besset lohkat daid. Dat lea hui buorre, dadjá son.

Váldodoaimmaheaddji lasiha vel ahte dán áigge, go eanet ja eanet olbmot lohket ođđasiid neahtas ja mobiltelefuvnnas, de lea dehálaš ahte fállat buori digitála fálaldaga, ja dat galgá ge leat Ávvira vuoruhansuorgi maiddái ovddasguvlui.

 

Obbalaččat 14 ođđa lohkki

Ságat aviissa váldodoaimmaheaddji lea positiiva, ja illuda go olahit veahá ovdáneami. Sii ožžo obbalaččat 14 ođđa lohkki, ja sis leat oktiibuot 2 942 diŋgojeaddji geat lohket sin aviissa, sihke báber- ja


Ságat aviissa váldodoaimmaheaddji, Geir Wulff. Govven: Lars B. Persen/Ságat

digitálaaviissa.

– Sáhttit illudit go lea veahá ovdáneapmi. Dat lea hui positiiva, dadjá Geir Wulff.

Son jáhkká ovdáneami boahtit das go nagodit buvttadit buori journalistihka.

– Olbmot lohket buriid áššiid, ja dat lea dat mii vuovdá. Sihke Ságat ja Ávvir ain buorránit ja gokčet viidábut ja viidábut. Dat lea mu mielas hui buorre, dadjá Geir Wulff.

 

Nu buorre ahte masset preassadoarjaga

Finnmark Dagbladas ledje buoremus lohkkiidlogut Finnmárkkus. Lassánan olles 12 proseanttain, oktiibuot 6 058 diŋgojeaddji. Dat lea nu buorre ahte masset preassadoarjaga.

 

Finnmárkku aviissaid logut:

Altaposten 4 106 (+375)
Ávvir 1 034 (+3)
FD 6 058 (+651)
Finnmarken 5 142 (+203)
Finnmarksposten 1 118 (-58)
Hammerfestingen 1 259 (+14)
Kronstadposten 1 653 (+73)
Kyst og fjord 1 912 (-20)
Ságat 2 942 (+14)
Sør-Varanger avis 2 945 (-233)
Østhavet 1 321 (-105)

 

-Almmuhus-