-Almmuhus-
OĐĐASATJuolludan doarjagiid guolástanfatnasiid oastimii

Juolludan doarjagiid guolástanfatnasiid oastimii

-

-

Sámediggeráđđi lea juolludan oktiibuot lagabui miljovnna ruvnnu Gálssa, Ráissa ja Deanu guolásteaddjái vai beasašedje iežaset fatnasiiguin álgit guolástusealáhussii.

Sii leat ožžon doarjaga sihke fatnasiid ja bivdosiid oastimii.

– Dá leat buorit ovdamearkkat dasa ahte Sámediggi háliida leat mielde huksemin lagas riddofanasveaga mearrasámi ássanguovlluide, dadjá sámediggeráđi Silje Karine Muotka preassadieđáhusas.

 

– Vuoruha nannosit 


Preassagovva: Åse M.P. Pulk/Sámediggi

Sámediggi lea gieđahallan ášši mearrasámi strategiijaid birra, ja guolásteami nannen lea deaŧalaš čuovvoleapmi mearrasámi báikegottiid nannemis.

– Sámediggi vuoruha nannosit jahkásaš bušeahtastis váikkuhangaskaomiid mearrasámi riddo- ja vuotnaguovlluid fanasveaga ovddideapmái ja nannemii. Lassin dasa ovddida Sámediggi guolástuspolitihka, mas guovddážis lea unnimus gozihit ja nannet fatnasiid vuoigatvuođaid riddo- ja vuotnabivdui, lohká Muotka.

 

Olu beroštupmi 

Sámedikkis leat buorit doarjjaortnegat daidda geat iežaset fatnasiiguin háliidit guolásteaddjin álgit.

Ollu ruhtaohcamat mat gávdnojit, čájehit ahte lea beroštupmi, initiatiiva ja positiiva oaidnu álgit guolástusealáhussii iežaset fatnasiiguin.

– Lea deaŧalaš váikkuhit dan ahte hukset aktiiva riddo- ja vuotnafanasveaga, mainna bisuhivččii guolásteami sámi riddo- ja vuotnaguovlluin. Ulbmillaš váikkuhangaskaomiiguin lea Sámediggi mielde ráhkadeamen buoret rámmaeavttuid fanasveaga ođasmahttimii ja nu nannemin ođđa rekruterema guolástanfidnui, dadjá sámediggeráđi Silje K. Muotka.

-Almmuhus-