Rádjeguovllu ássit finadit dávjjit ruoššabeale

Politiija logut čájehit ahte diibmá lei alimus lohku rádjerasttildemiin 2014 rájes.

Obbalaš lohku dan jagi ledje 265 177 rádjerasttildeami Storskoga bokte. 2016:s ledje 235 469 geat rasttildedje rájá.

– Beroštupmi rasttildit rájá lea lassánan. Buorre infrastruktuvra dahká álkibun galledit gávpogiid rádjáguovlluin. Čájehuvvo leat bivnnuhin geavahit rádjeássiduođaštusa ja ahte dát ortnet doaibmá bures, lohká Barentsčállingotti ráđđeaddi, Marit E. Jacobsen, Girkonjárggas preassadieđáhusas.

Geasuhit olbmuid badjel rájá

– Olbmot eai vuolgge dušše gávppašit hálbbes gálvvuid, Barentsčállingoddi lea vuohttán ahte leat gelddolaš kulturfálaldagat ja báikkálaš fitnodagat mat geasuhit mátkkošteddjiid badjel rájá, lohká Jacobsen.

Vásihit máilmmibeakkán teáhtera

Dán vahkkoloahpa sáhttet dáža mátkkošteaddjit ovdamearkka dihte beassat vásihit máilmmibeakkán Bolsjoi-teáhtera mii boahtá Moskvas rádjegávpogii Zapoljarnyjii sin baleahttaklassihkkáriin «Niehttecuvkejeaddji» (Nøtteknekkeren).

Lassáneapmi

Go buohtastahttá 2016 loguin, de lea 25,5 proseantta lassáneapmi dážain geat mátkkoštit Ruššii rádjeássiduođaštusain. 2017:s lea obbalaš lohku 46 364 geat rasttildedje rádjeássiduođaštusain ja 2016:s ledje 36 937 geat rasttildedje rájá.

Lea stuorra lassáneapmi go geahččá gallis nuppe bealde rájá rasttildit Norgii. Ruošša ássiid lohku, geat mátkkoštedje rádjeássiduođaštusain, lei 25 278 ja 2016:s lei lohku 19 980. Dát lea 23,6 proseantta lassáneapmi.

Sávvá lassáneami 2018:s

– Johtalus čájeha ahte olbmot dáhttot oktavuođa sin kránnjáiguin ja leat sáhkkit kránnjáid ektui. Mii sávvat ahte joatkašuvvá dáinna lágiin 2018 maiddái, lohká Jacobsen.

Rádjesoahpamuš

Rádjeássiduođaštusain sáhttet buohkat, geat orrot gitta 30 kilomehtera Norgga-Ruošša rájás galledit rádjeguovllu.

Dát soahpamuš lea doaibman 2012 rájes ja leat 9 000 olbmo Finnmárkkus geat ožžot geavahit rádjefálaldaga ja Ruošša bealde lea 40 000 olbmo geat besset geavahit ­rádjefálaldaga.